"რატომ ბუდუ? ამ სახელს თავისი ისტორია აქვს" - ინტერვიუ ცნობილი ფეხბურთელის მამასთან: ვის ჰგავს სტუმართმოყვარეობაში ბუდუ ზივზივაძე და როგორი იყო ოჯახის ემოციები დიდი გამარჯვების შემდეგ
საბერძნეთის დამარცხებისა და ევროპის ჩემპიონატზე გასვლის შემდეგ, საქართველოს ნაკრების ფორვარდი ბუდუ ზივზივაძე გერმანულ კლუბ "კარლსრუეს" დაუბრუნდა, სადაც თანაგუნდელებმა საზეიმო დახვედრა მოუწყვეს. (ნახეთ: ბუდუს კიდევ ერთი პერფორმანსი გვირგვინით და საზეიმო დახვედრა "კარლსრუეში" (ვიდეო)
- 30 წლის ქართველი სპორტსმენის ღირებულება transfermarkt.com-ზე ამჟამინდელი მონაცემებით 700 ათასი ევროა. გერმანული მედია ქართველ ფორვარდზე წერს:
"მისი სამშობლო საქართველოა. ბუდუს ინსტაგრამზე გვხვდება, ძირითადად, ოჯახთან ერთად გადაღებული ფოტოები. როგორც ჩანს, პროფესიონალისთვისაც ყველაფერი ცოლის, ქალიშვილისა და ფეხბურთის გარშემო ტრიალებს.“
ოჯახი წლების წინ შექმნა, მეუღლე ნინი კვერნაძე, როგორც თავად ბუდუ, ქუთაისიდან არის. წლების წინ წყვილმა ერთმანეთი სოციალური ქსელის საშუალებით გაიცნო და ერთ გოგონას, შაის ზრდიან.
"მაშინ ბუდუ ასეთი ცნობილი და წარმატებული ფეხბურთელი არ იყო. ორივე ქუთაისიდან ვართ, ბევრი საერთო ნაცნობი აღმოგვაჩნდა. ჩვენ შორის სიმპათია პირველსავე შეხვედრიდან გაჩნდა, რომელიც შემდგომ განვითარდა და ოჯახის შექმნით დაგვირგვინდა. მაშინ ბუდუ დანიიდან ერთი კვირის ჩამოსული იყო, თბილისის "დინამოში" თამაშობდა. რომ დავინახე, გარეგნობით ძალიან მომეწონა. იყო საკმაოდ მორცხვი, თავმდაბალი. ბუდუ ძალიან თბილი და მოსიყვარულე ადამიანია. გაცნობიდან დაახლოებით 6 თვის შემდეგ გამომიტყდა, რომ ვუყვარდი. ეს არ ყოფილა ახლობლების, მეგობრების თანდასწრებით, მხოლოდ ჩვენ ორნი ვიყავით." - ამბობდა ჟურნალ "გზასთან" ინტერვიუში ნინი.
რატომ ბუდუ?
პოპულარობის შემდეგ მედია მისი სახელითაც დაინტერესდა. როგორც ფეხბურთელის მამა 2018 წელს სოციალურ ქსელში წერდა, შვილს მამის სახელი დაარქვა.
"1994 წლის 10 მარტია. მის დაბადებას ველოდებით, მაგრამ ისეთი დროა, ვაზი სამუშაოებს მოითხოვს. სოფელში ვარ, გამალებულ სამუშაოებს ვასრულებ. მიშიკო ავალიანი და დათო გეგეშიძე გამოჩნდნენ. გულმა მიგრძნო და ისმის მიშიკოს ხმა - ბიჭია, ბიჭიიი!
პირველი რაც გავიფიქრე, მამაჩემის სახელი და ადამიანობა გაგრძელდა. ბაბუასავით თავაწეული დააბიჯებს ამ ქვეყანაზე. წარმატებები შენს მომავალს!“ - წერდა კახა ზივზივაძე.
"ჩემთან ოჯახში...“
მოგეხსენებათ, 2024 წლის ევროპის ჩემპიონატი, რომელიც სტარტს 14 ივნისს აიღებს, გერმანიაში გაიმართება.
ქართველები ბილეთებსა და სასტუმროების ჯავშანზე უკვე ზრუნავენ. ბუდუმ, რომელიც თავადაც გერმანიაში ცხოვრობს, ჟურნალისტებთან ინტერვიუში განაცხადა, რომ ქომაგებს, რომლებიც გერმანიაში სასტუმროს ვერ იშოვიან, საკუთარ სახლში პირადად მიიღებს.
- "ვინც გერმანიაში სასტუმროს ვერ იშოვით, ჩემთან, სახლში გეპატიჟებით", - განაცხადა ზივზივაძემ ჟურნალისტებთან.
ამ განცხადებას სოციალურ ქსელში დიდი გამოხმაურება მოჰყვა, ხალხი უკვე იმაზე ხუმრობს, თუ სად მოათავსებს ამდენ ქართველს ზივზივაძე. მოგვიანებით ქართველ ფორვარდს ამ თემაზე განმარტების გაკეთებამ მოუწია, "პირველ არხთან“ ინტერვიუში ამბობს, რომ ამ საკითხზე მის ოჯახთან გაირონ კონსულტაციები.
ბუდუ ზივზივაძე:
- დიდი სახლი არ მაქვს, მაგრამ არ არის პრობლემა. შემიძლია მისაღებ ოთახში მივწიო რაღაცები და ლებები დავაფინო, შეუძლიათ, რომ დარჩნენ ჩემთან. მაგ დროს მე შეკრებაზე ვიქნები ნაკრებთან და მაგ საკითხზე ჩემს ოჯახთან უნდა გაიარონ კონსულტაციები, ვისაც სურვილი აქვს ჩემთან დარჩეს.
- AMBEBI.GE ბუდუს მამა, ბატონ კახა ზივზივაძეს დაუკავშირდა. მას ვთხოვეთ ბუდუს სახელის ისტორია ჩვენთვის ვრცლად მოეყოლა. ემოციებს ახლაც ვერ მალავს, ქუჩაში გასვლისას უამრავი ადამიანი ხვდება და ეკითხებიან, თქვენ ხომ ბუდუს მამა ხართ...
- მამაჩემის სახელი დავარქვი ბუდუს, საერთოდ, ცხოვრებაში ყველა ადამიანის ვალია, მამას პატივი სცეს, თან როდესაც ის ახალგაზრდა გარდაიცვლება, რომ მისი სახელი გაგრძელდეს. ჩემმა შვილმა ეს სასწაულად გააკეთა. შეიძლება ვიღაცებს პრეტენზია ჰქონდეთ სახელების მოწონებაში, მაგრამ მთავარია, ადამიანი და მისი ცხოვრება.
- არა, ბატონო კახა, უბრალოდ მოსაფერებელი სახელი ეგონათ...
- მამა იყო ადამიანი, რომელიც იმსახურებდა მისი სახელის გაგრძელებას.
- მე ვიპოვე სოციალურ ქსელში თქვენი სტატუსი, სადაც საოცრად აღწერთ ბუდუს დაბადების ისტორიას. ვენახში ვიყავი და ვსხლავდიო...
- მამაჩემის გარდაცვალება ჩემთვის ძალიან დიდი ტრაგედია იყო. მოხდა ისე, რომ გაჩნდა ჩემი შვილი და ამ სტატუსში ის აღვწერე, რასაც იმ წუთას განვიცდიდი.
- ბუდუმ გულშემატკივრებს მიმართა და უთხრა, ვინც სასტუმროს ვერ იშოვიდნენ, მასთან დარჩენილიყვნენ, ლეიბებს დავუგებთო...
- მეც ვეთანხმები, ძალიან მიყვარს სტუმარი, მამა ასეთი კაცი იყო. ისეთი შეგრძნება მაქვს, მისი სული გადავიდა ბუდუს სულში. მადლობა მას, რომ დიდი შრომით, წაქცევით, ფეხზე დადგომით, შეძლო და არ გატყდა. ყველაფერი გააკეთა იმისთვის, რომ ამდენისთვის მიეღწია. ბუდუს აქვს ჩაწერილი ვიდეო, სადაც ამბობს, მამაჩემი ჩემზე ბედნიერიაო. მადლობა მას ამისთვის.
ბუდუ გერმანიის ქალაქ კალცრუეში ცხოვრობს და თამაშობს იმ გუნდში, სადაც ჩვენი საყვარელი იაშვილი, იაშკა თამაშობდა. ახლაც ვერ ვიკავებ ემოციებს. ჯავრზე უფრო ემოციური ყოფილა ამხელა აღიარება.
- წარმომიდგენია, რა ხდება თქვენს თავს, როდესაც ქუჩაში გადიხართ...
- 18 წლის ვიყავი, მამა რომ დამეღუპა, ქუჩაში რომ გავდიოდი და სადმე ვიტყოდი, ვისი შვილი ვიყავი, ისეთი პატივით მხვდებოდნენ. დღეს გავდივარ და მეუბნებიან, ვაა, ბუდუს მამა ხარ, შენ შემოგევლე. კითხვა დავსვი, მე სად ვარ-მეთქი და ერთმა ძალიან ძვირფასმა ადამიანმა მითხრა, ცენტრში ყოფილხარ, შე დალოცვილოო.
- ნახეთ ვიდეო: "ამის უკან მიწევა შემიძლია და აქ ლეიბების ჩადგმა" - ბუდუ ზივზივაძე აქვეყნებს ვიდეოს, თუ სად აპირებს ქართველების მასპინძლობას