ვახტანგ ძაბირაძე: "როცა არ გაქვს დემოკრატიული ინსტიტუტები, დამოუკიდებელი სასამართლო და ა.შ. ეს კანონი ზუსტად ისევე იმუშავებს, როგორც რუსეთში მუშაობს" - რას ცდილობს "ოცნება" და უნდა ველოდოთ ისევ აქციებს?
საპარლამენტო უმრავლესობა პარლამენტში “უცხოური გავლენის გამჭვირვალობის შესახებ“ კანონპროექტის კვლავ ინიცირებას აპირებს. საპარლამენტო უმრავლესობის ლიდერის მამუკა მდინარაძის განცხადებით, პროექტი პარლამენტში ზუსტად იმავე ტექსტით შევა, როგორიც შარშანდელი კანონპროექტი იყო. მისივე თქმით, ერთადერთი განსხვავება იქნება ის, რომ ტერმინი "უცხოური გავლენის აგენტი“ ტერმინით “უცხოური ძალის ინტერესების გამტარებელი ორგანიზაცია“ ჩანაცვლდება. "ოცნების“ ამ ინიციატივას პარლამენტის პლენარულ სხდომაზე საპარლამენტო უმრავლესობის წევრებსა და ოპოზიციონერ დეპუტატებს შორის სიტყვიერი დაპირისპირება მოჰყვა. ოპოზიციამ "ქართული ოცნების“ გადაწყვეტილება გააპროტესტა, მას რუსული კანონი უწოდა და ევროკავშირზე პირდაპირ უარის თქმად შეაფასა.
"ეს კანონი არ უნდა გავატანინოთ! ყველას მოვუწოდებ, ვინც არის ნორმალური ადამიანი ამ ქვეყანაში, ვისაც უნდა ნორმალურ ქვეყანაში, ვისაც უნდა, რომ ეს ქვეყანა ევროპის ნაწილი გახდეს, აბჯარი აისხით, მოემზადეთ, დიდი ვნებათაღელვა და ცემა-ტყეპა გველის. ეს არ უნდა გავატანინოთ!" - ამის შესახებ ჟურნალისტებს პარტია "მოქალაქეების” ლიდერმა, ალეკო ელისაშვილმა განუცხადა. ელისაშვილის შეფასებით, ტყუილია იმაზე ლაპარაკი, რომ არასამთავრობო ორგანიზაციები "რაღაც ბნელ ფულს იღებენ“.
"ქართული ოცნების“ არგუმენტები არ მაინტერესებს, ყველაფერი გამჭვირვალეა, არასამთავრობო ორგანიზაციების დაფინანსება 100%-ით არის გამჭვირვალე. ტყუილია იმაზე ლაპარაკი, რომ არასამთავრობო ორგანიზაცია რაღაც ბნელ ფულს იღებს. არ ასვენებთ გამჩენი. ეტყობა რაღაც ვალდებულებები აქვთ ამ რუსებთან და ისინი ავალდებულებენ, სხვა ლოგიკური და ნორმალური ახსნა ამას არ აქვს“, - განაცხადა ელისაშვილმა.
"არანაირ რუსულ კანონს საქართველოს პარლამენტი არ იღებს, არც არასდროს მიუღია და არც არასდროს მიიღებს. ნუ ატყუებთ ქართველ ხალხს“, - ასე მიმართა პარლამენტის თავმჯდომარემ შალვა პაპუაშვილმა "ევროოპტიმისტების“ დეპუტატს, ხატია დეკანოიძეს, რომელმაც "უცხოური გავლენის გამჭვირვალობის შესახებ“ კანონპროექტს "რუსული“ უწოდა.
რისთვის სჭირდება და რატომ ცდილობს ხელისუფლება ერთხელ უკან გაწვეული კანონის კვლავ კბილებით გატანას, ამ კითხვებზე ambebi.ge - ს პოლიტოლოგი ვახტანგ ძაბირაძე პასუხობს:
"მოსალოდნელი იყო, რომ "ქართული ოცნება“ ამ თემას ისევ დაუბრუნდებოდა გამომდინარე იქიდან, რა მიზანიც აქვს და რა დიაპაზონშიც ის ცდილობს საარჩევნო პროპაგანდის გამართვას, მოგებას და ა.შ. პრინციპში, ბოლო პერიოდში მათ გამოსვლებში მუდმივად ჩანს ჩვენს დასავლელ პარტნიორებზე შეტევა (რასაც ისინი კრიტიკას უძახიან). რაც შეეხება კანონს, ძალიან მნიშვნელოვანია ორი რამ:
1. თუ ლაპარაკია იმაზე, რომ უცხოეთიდან შემოსული დაფინანსება უნდა იყოს გამჭვირვალე, ეს არა მარტო არასამთავრობო ორგანიზაციებში, არამედ ყველგან უნდა იყოს, სადაც კი პოლიტიკურ თემასთან და დემოკრატიულ პრინციპებთან შეხება ხდება, ამაში პრობლემას ვერ ვხედავ, ასეც უნდა იყოს და ხალხმა უნდა იცოდეს, სად და როგორ მიდის თანხები.
2. რაც შეეხება კანონის სახელწოდებას, ძველსა და ახალს შორის არაფერი განსხვავება არ არის. რა პრობლემაა, ჩაწერონ "არასამთავრობო ორგანიზაციები“, ან ნებისმიერი ორგანიზაცია და არა "უცხოური ძალის ინტერესების გამტარებელი ორგანიზაცია“. იმ შემთხვევაში თუ მათ ფინანსები აინტერესებთ და პროპაგანდისტული მიზანი არ ამოძრავებთ, მაშინ ცალსახად ვემხრობი, რომ ფინანსები იყოს გამჭვირვალე, ჩვენ ბევრგან გვჭირდება გამჭვირვალობა, ძალიან შორს უნდა წავიდეთ გამჭვირვალობაში, ვინაიდან ქვეყანაში არის გაქანებული კორუფცია. მოყოლებული 1972 წლიდან, მუდმივად არის ლაპარაკი იმაზე, რომ კორუფცია უნდა დავამარცხოთ, არა და ის უფრო და უფრო მაღალ ეშელონებში ადის და ფართო მასშტაბებს იღებს.
ახლა ჩვენთან გაქანებული ელიტური კორუფციაა. რაც შეეხება იმას, არის თუ არა ეს რუსული კანონი, როდესაც შენ არ გაქვს დემოკრატიული ინსტიტუტები, როდესაც არ გაქვს დამოუკიდებელი სასამართლო, გაქვს მონოპოლია მედიაზე, როდესაც აკონტროლებ ყველას და ყველაფერს და თავად ხარ შავი ფულის დამტრიალებელი, ეს კანონი ზუსტად ისევე იმუშავებს, როგორც მუშაობს რუსეთში და არა ისე, როგორც ამერიკაში ან დასავლეთის ნებისმიერ ქვეყანაში. ამიტომ არის ეს კანონი რუსული - კანონი საზოგადოების განვითარებას და საზოგადოებაში არსებულ ვითარებას უნდა მოერგოს და არა - ავიღოთ და ბრმად გადმოვიღოთ ნებისმიერი დემოკრატიული ქვეყნიდან. ამიტომაც არსებობს პარლამენტი, ან პარლამენტი რად გვინდა, თუ შეგვიძლია კანონები ვთარგმნოთ და მივიღოთ? - დავიქირაოთ მთარგმნელთა რაღაც კოლეგია, რომელიც აიღებს და თარგმნის სხვა ქვეყნის კანონებს, მივიღებთ და ვიცხოვრებთ.
დღეს ჩვენთან სპეციფიკური ვითარებაა და ამ სპეციფიკას უნდა მოერგო, სხვაგვარად, ეს კანონი რომ ზუსტად ისე იმუშავებს, როგორც მუშაობს რუსეთში. ამ მხრივ შორს ისედაც არ ვართ რუსეთისგან - პუტინი 24 წელია ხელისუფლებაში და ივანიშვილი - 12 და ორივე 30 წლამდე ყოფნას აპირებს. როცა ასეთი ვითარება გაქვს, რა განსხვავებაა, უბრალოდ, არ მესმის. ჩვენ სიტყვის თავისუფლება კი არა, ლაპარაკის უფლება გვაქვს, რუსეთში ლაპარაკის უფლებასაც კითხვის ნიშნის ქვეშ აყენებენ. სიტყვის თავისუფლება იმას ნიშნავს, როდესაც საჯარო სივრცეში რაღაც ითქმება, ამაზე უნდა რეაგირებდეს ხელისუფლება. როცა ხელისუფლება ამაზე არ რეაგირებს და არ აინტერესებს ვინ რას და როგორ იტყვის, მაშინ ამას არა სიტყვის, ლაპარაკის თავისუფლება ჰქვია და ეს, კი ბატონო, გვაქვს.
ასეთის პოლიტიკა, რასაც დღეს "ქართული ოცნება“ აწარმოებს, ერთის მხრივ თითქოს დიალოგს მართავს და ბრიუსელში და ევროპის სხვა ქვეყნებში ჩადიან, მეორეს მხრივ, ხელისუფლების მხრიდან ქვეყანაში არის გაქანებული ანტიდასავლური პროპაგანდა. არანაირი რეალური რეფორმა ამ ქვეყანაში არ გატარებულა. ჩვენგან არ მიიღებენ იმას, რომ კიდევ ერთხელ ავანსად მოგვეცით სტატუსი და მისთანები. "ოცნება“ ამისთვისაც ამზადებს ნიადაგს, მას უნდა, მოსახლეობა დაარწმუნოს იმაში, რომ სტატუსი მაგ. ლგბტ პროპაგანდის გამო არ მოგვცეს, რომ აგენტურას აფინანსებენ, რომ "ოცნება“ იბრძვის ქართული ინტერესებისთვის და ამიტომაც გვჩაგრავენ და სხვა..“
რა შეიძლება მოჰყვეს საკანონმდებლო ორგანოში კანონის გატანას, რა ტაქტიკა შეიძლება დაუპირისპიროს ოპოზიციამ ამ ინიციატივას და მივიღებთ თუ არა სახეზე გასული წლის მარტის აქციების ანალოგიურ პროტესტს საზოგადოების მხრიდან, ამაზე ვახტანგ ძაბირაძე ამბობს:
"ვერ გეტყვით, განმეორდება თუ არა იგივე პროტესტი, რაც 2023 წლის მარტში ვნახეთ... არც იმაში ვარ დარწმუნებული, რომ იგივე უნდა განმეორდეს. არ მგონია, სწორი იყოს ახლა აქციების გამართვა. პროტესტი უნდა იყოს ალბათ ერთჯერადი, საკმაოდ მშვიდი და ჩვენ უნდა ვემზადოთ არჩევნებისთვის. ჩემი აზრით, დღეს საკითხი წყდება არა რუსთაველზე, არამედ არჩევნებზე, ოქტომბერში. აი, ოქტომბრისთვის კი ნამდვილად უნდა ვემზადოთ და პირველ რიგში, ოპოზიცია უნდა ემზადოს ამისთვის, მან უნდა გააცნობიეროს, რომ მარტო გამოსვლები და ლაპარაკი არაფერს შველის, ამაში უკვე დავრწმუნდით. ერთი წლის წინ ხომ ვერ მიიღეს ეს კანონი, ახლა ისეთ შესავალს აკეთებენ და ისეთი მიმართულება აქვთ, ალბათ, მიიღებენ. პრობლემა ისაა, რომ 1 წლის წინ ამას მოჰყვა მთელი ენერგიის ხარჯვა, 1 წლის შემდეგ ისევ შემოგვიტრიალეს. ახლა რომც ჩავაგდოთ, არჩევნებში ხელისუფლება ისევ უმრავლესობით თუ მოვიდა, კანონს ისევ შეგვიტრიალებენ. ამიტომ არჩევნებში უნდა მოხდეს გარდატეხა და "ქართული ოცნება“ უმრავლესობით არ უნდა მოვიდეს ხელისუფლებაში, აქედან ესაა გამოსავალი. ჩემი აზრით, შარშანდლის ანალოგიური აქციები ვერაფერს შეცვლის, პროტესტი ალბათ იქნება, მაგრამ ის უნდა იყოს საკმაოდ მშვიდი და წყნარი. მზადება უნდა იყოს არჩევნებისთვის და არა მთელი ძალები ახლა იმაზე დაიხარჯოს, რომ ეს კანონი არ მიიღოს ხელისუფლებამ. არჩევნების შედეგად "ოცნების“ უმრავლესობას თუ არ მივიღებთ, ეს კანონიც გაუქმდება და არანაირი პრობლემა არ იქნება“.
იხილეთ ასევე:
ნანა ფიცხელაური