"ალავერდი ხელისუფლებასა და ოპოზიციასთან: როგორმე, იქნებ მოახერხოთ, რომ ფეხბურთელებს ან სულ არ შეეხოს ან ნაკლებად შეეხოს ის ქარიშხალი, რაც სადღეისოდ ჩვენს ქვეყანაში მძვინვარებს"
სპორტული გამოცემა lelo.ge აქვეყნებს სტატიას სათაურით: "აპოლიტიკური წერილი ფეხბურთსა და პოლიტიკაზე", რომლის ავტორიც ალეკო კაკაურიძეა:
მინდა, იმთავითვე განვმარტო - წერილი, რომელსაც მკითხველი გაეცნობა, სრულიად აპოლიტიკურია, ოღონდ, პოლიტიკის ხშირად ხსენებას მაინც ვერ ავცდები სადღეისოდ ქვეყანასა და ქართულ ფეხბურთში არსებული ვითარების გამო.
ვერ ავცდები და თუ ავცდი, ეს იმას ნიშნავს, რომ თავზე მიწა მაქვს წაყრილი და რეალობას გავურბივარ. და თუ ეს ასე მოხდა, მაშინ გახვრეტილი შაურიანის ფასი აღარ ექნება არც ამ წერილს და, ასე განსაჯეთ, არც მის ავტორს...
ფაქტია: ბოლო დღეებში საქართველოში მნიშვნელოვნად აიწია პოლიტიკურმა ტემპერატურამ. ყველა ქართველს, საქართველოში მცხოვრებსა თუ ემიგრანტს, თავისი ჩამოყალიბებული აზრი აქვს მიმდინარე მოვლენებზე და, ცხადია, ასე ვარ მეც, მაგრამ ამ ეტაპზე ჩემს აზრს არ გამოვამზეურებ, რადგან მიმაჩნია, რომ კონკრეტულ სიტუაციაში ამას გადამწყვეტი მნიშვნელობა არ აქვს.
თანაც, რაოდენ უმნიშვნელოა ეს მაშინ, როცა ევროპის ჩემპიონატის დაწყებამდე სულ მცირე დრო რჩება და სწორედ ამ დროს ფეხბურთი და პოლიტიკა ჩვენთან მძაფრად გადაეჯაჭვნენ ერთმანეთს.
ცუდია მეგობრებო, ძალიან ცუდი. ახლა ყველა ქართველი ფეხბურთელი მხოლოდ ევროპის ჩემპიონატზე უნდა ფიქრობდეს და არა რაიმე სხვაზე. ალავერდი ხელისუფლებასა და ოპოზიციასთან - როგორმე, იქნებ ისე მოახერხოთ, რომ ფეხბურთელებს ან სულ არ შეეხოს, ან ნაკლებად შეეხოს ის ქარიშხალი, რომელიც სადღეისოდ ჩვენს ქვეყანაში მძვინვარებს.
გვერწმუნეთ, ნებსით თუ უნებლიედ, ეს აუცილებლად დაამჩნევს კვალს საქართველოს ნაკრების ასპარეზობას ევროპის ჩემპიონატზე. დაამჩნევს, რადგან გვინდა თუ არა, დღევანდელ ფეხბურთში ფსიქოლოგიურ მომზადებას უდიდესი მნიშვნელობა აქვს.
განსაკუთრებით მაშინ, როცა საქმე დიდ საფეხბურთო ტურნირებს, მარათონულ ფორუმებს ეხება და ასეთია სწორედ ევროპის ჩემპიონატი. დიახ, გერმანიაში საქართველოს ნაკრები მინიმუმ 3 მატჩის სათამაშოდ ჩადის და, იმედი გვაქვს, ამ მატჩების რაოდენობა მეტიც იქნება.
მთავრობამ თუ ოპოზიციამ, საქართველოს ფეხბურთის ფედერაციამ თუ უბრალო გულშემატკივარმა ყველაფერი უნდა გააკეთოს საიმისოდ, რომ როგორმე პოლიტიკურ აჟიოტაჟს მოწყვიტოს ფეხბურთელები.
პოზიციას რა მნიშვნელობა აქვს - ადამიანი ყველა შემთხვევაში ადამიანია, ის მძაფრად აღიქვამს ყველაფერ იმას, რაც მას უკავშირდება. თავად გამომიცდია: თუნდაც სოციალურ ქსელში შენ მიმართ გამოთქმულმა, ერთი შეხედვით, უწყინარმა შენიშვნამაც კი შეიძლება, დიდზე დიდი დაღი დაგასვას, კარგა ხნის განმავლობაში ამოგაგდოს მწყობრიდან, დაგავიწყოს საქმე და საკეთებელი. გააგრძელეთ კითხვა