"გაიგეთ ქართველი ხალხის ხმა და გაიწვიეთ კანონი, წინააღმდეგ შემთხვევაში, დაგახევთ ამ კანონს თავზე" - ნანა მალაშხია
თბილისში, რუსთაველის გამზირზე აქცია სახელწოდებით "კი ევროპას! არა რუსულ კანონს!“ მიმდინარეობს". აქციაზე სიტყვით გამოვიდა გასული წლის მარტის მოვლენების ერთ-ერთი მთავარი გმირი, "ქალი ევროკავშირის დროშით", ნანა მალაშხია.
"ჩემთვის პატივია ვიდგე აქ თქვენთან ერთად, სადაც იწერება კიდევ ერთი თავი თავისუფლებისთვის ბრძოლის. დღეს ხელისუფლება ცდილობს ტოტალური კონტროლი დაამყაროს ჩვენზე, სამოქალაქო საზოგადოებაზე, ჩაახშოს თავისუფალი სიტყვა და მიზანმიმართულად დააზიანოს ევროინტეგრაციის პროცესი.
ჩვენი ქვეყნის სტრატეგიული პარტნიორები, მეგობრები, რომლებთანაც ხელშეკრულება ამ ხელისუფლებას აქვს გაფორმებული, გვაფრთხილებენ, რომ ეს სერიოზულად დააზიანებს ქვეყნის დემოკრატიულ პროცესს და სერიოზული პრობლემა იქნება ჩვენი ევროინტეგრაციისთვის.
ქართული ოცნება დღეს თავს საქართველოს კონსტიტუციაზე მაღლა აყენებს, მათ შევახსენებ 78-ე მუხლს, კონსტიტუციურმა ორგანოებმა თავიანთი უფლებამოსილების ფარგლებში მიიღონ ყველა ზომა ევროპის კავშირისა და ჩრდილოატლანტიკური ორგანიზაციაში საქართველო სრული ინტეგრაციის უზრუნველყოფისთვის.
არავინ დგას კონსტიტუციაზე მაღლა, არავინ დგას ხალხზე მაღლა. დღეს ხელისუფლება თვითონ გახდა კიდევ უფრო გამჭვირვალე თავის შინაარსსა და მიზნებში - დღეს არა მარტო კანონია რუსული, დღეს ჩვენ გვყავს რუსული ხელისუფლება
გაიგეთ ქართველი ხალხის ხმა და გაიწვიეთ კანონი, წინააღმდეგ შემთხვევაში, დაგახევთ ამ კანონს თავზე,“ - ამბობს ნანა მალაშხია.