ტრაგედია კანონპროექტის მიღებიდან რამდენიმე საათში: დაღუპულია 5 მიგრანტი, მათ შორის 7 წლის გოგონა - "მათ ინგლისში გადასვლა სურდათ"
ლა-მანშის სრუტის გადალახვის მცდელობისას 5 მიგრანტი დაიღუპა, მათ შორის ერთი ბავშვია. არსებული ინფორმაციით, დაღუპულთა ცხედრებს 23 აპრილს, ვიმეროქსის სანაპიროზე მიაკვლიეს. მედიის ინფორმაციით, სამაშველო ოპერაციის შედეგად დაახლოებით 100 მიგრანტი გადაარჩინეს და ფრანგული სამხედრო გემის ბორტზე მოათავსეს.
ფრანგი ოფიციალური პირების თქმით, ნავმა, რომელსაც მიგრანტები გადაჰყავდა, საფრანგეთის ჩრდილოეთით მდებარე ვიმეროს სანაპირო დღეს დილით დატოვა. იგი "მძიმედ დატვირთული" იყო და მასზე 112 ადამინი იმყოფებოდა.
ადგილობრივმა ოფიციალურმა წარმომადგენელმა ჟაკ ბილანტმა სამშაბათს განაცხადა, რომ სასწრაფო სამსახურებმა 47 მიგრანტი გადაარჩინეს, ოთხი კი საავადმყოფოში გადაიყვანეს. მისივე თქმით, რომ 50-ზე მეტმა ადამიანმა ნავზე დარჩენა და ინგლისისკენ მოგზაურობის გაგრძელება გადაწყვიტა.
"მიუხედავად რთული და დელიკატური სიტუაციისა, 57 ადამიანი კვლავ ბორტზე დარჩა, არ სურდათ გადარჩენა, მოახერხეს ძრავის გადატვირთვა და გააგრძელეს გზა დიდი ბრიტანეთისკენ, საზღვაო ძალების მეთვალყურეობის ქვეშ" - თქვა ბილანტმა.
გადარჩენილები შემთხვევის შედეგად დაღუპული 7 წლის გოგონას მამის ემოციებს იხსენებენ:
"საშინელი სანახაობა იყო. ხმამაღლა ტიროდა. ქალიშვილი თვალწინ დაეღუპა. მას კარგად ვიცნობთ, რადგან პატრულირების დროს ხშირად გვინახავს." - ამბობენ თვითმხილველები.
ცნობისთვის, შემთხვევამდე რამდენიმე საათით ადრე, დიდი ბრიტანეთის პარლამენტმა კანონპროექტი მიიღო თავშესაფრის მაძიებლების რუანდაში დეპორტაციის შესახებ. კანონპროექტის თანახმად, რომელსაც აქტიურად უწყობდა ხელს ბრიტანეთის პრემიერ-მინისტრი რიში სუნაკი, ყველა რუანდელი, ვინც უკანონოდ გადაკვეთა ლა-მანშის სრუტე, დეპორტირებული იქნება დიდი ბრიტანეთიდან. კანონპროექტი ძალაში მას შემდეგ შევა, რაც მას დიდი ბრიტანეთის მეფე ჩარლზ III მოაწერს ხელს. ხელისუფლების გეგმების თანახმად, მიგრანტებისთვის განკუთვნილი პირველი რეისი დიდი ბრიტანეთიდან ივლისში გაემგზავრება. ბრიტანეთის შინაგან საქმეთა სამინისტროს სიაში შეყვანილია 350 ადამიანი.