"ყველაფერი რუსულის წინააღმდეგი ვარ" - დათო ევგენიძის თქმით, გავრცელებული ფრაზა თვე-ნახევრის წინ "რანინას" მონაწილის შეფასებისას თქვა და ახლა არასწორი ინტერპრეტაციით ვრცელდება

მუსიკოსი დავით ევგენიძე განმარტავს, რომ მისი ციტატა რელიგიასა და ქვეყნის ბატონობასთან დაკავშირებით არასწორი ინტერპრეტაციებით ვრცელდება. აღნიშნულის შესახებ მან "ნეტგაზეთთან" ისაუბრა.

ტელეკომპანია "იმედმა" 28 აპრილს გაავრცელა ევგენიძის ციტატა ამ შინაარსით: "მინდა, მსოფლიომ გაიგოს, ვერავინ გახდება ჩვენი ბატონი, ვართ ჩვენი მრწამსის, რელიგიის მატარებლები, მადლობა, რომ ქართველი ვარ.“

სინამდვილეში, დავით ევგენიძემ ეს ფრაზა საბავშვო მუსიკალურ პროექტ "რანინას“ ერთ-ერთი მონაწილის შეფასებისას თქვა, რომელმაც კონკურსში "ჩაკრულო“ შეასრულა და მას არ ჰქონია მიმდინარე პოლიტიკური ამბების კონტექსტი.

მუსიკოსი განმარტავს, რომ გადაცემა დაახლოებით თვე-ნახევრის წინ ჩაიწერა, როცა ე.წ. აგენტების შესახებ კანონპროექტი დღის წესრიგში საერთოდ არ იდგა.

"ძალიან სასაცილოა [ინტერპრეტაციები, რომელიც ამ ნათქვამს მოჰყვა] და გეტყვით, რატომ: მე ეს ციტატა ვთქვი "რანინაზე“. ეს იყო ჩანაწერი, რომელიც ეთერში გავიდა ამ შაბათს, ამ დროს, ეს იყო [ჩაწერილი] თებერვლის დასაწყისში", - აღნიშნა ევგენიძემ. რაც შეეხება კანონპროექტს, გამოცემასთან საუბრისას ამ თემაზე მან თქვა, რომ კანონს არ იცნობს, ამიტომ, უშუალოდ მისი შეფასებისგან თავი შეიკავა. თუმცა აღნიშნა, რომ "ყველაფერი რუსულის წინააღმდეგია“.