შსს განმარტავს, რატომ გამოიყენეს აქციაზე წყლის ჭავლი და სხვა საშუალებები - უწყება ახალ განცხადებას ავრცელებს
შინაგან საქმეთა სამინისტროს გავრცელებული განცხადებით, რუსთაველის გამზირზე, პარლამენტის შენობის მიმდებარე ტერიტორიაზე მიმდინარე აქციის მონაწილეთა პროტესტი გასცდა გამოხატვის თავისუფლებისა და მშვიდობიანი შეკრების კანონით დადგენილ ფარგლებს და მიიღო ძალადობრივი ხასიათი.
- როგორც მათ ინფორმაციაშია აღნიშნული, მიუხედავად პოლიციელების არაერთი მოწოდებისა, აქციის მონაწილეები არ ემორჩილებიან სამართალდამცველთა კანონიერ მოთხოვნებს.
"აქციის მონაწილეები სამართალდამცველებს სიტყვიერად და ფიზიკურად უპირისპირდებიან, ასევე მათი მიმართულებით ისვრიან სხვადასხვა საგანს.
გამომდინარე იქიდან რომ აქცია სრულად გასცდა კანონით დადგენილი შეკრება მანიფესტაციის ფარგლებს და გახდა ძალადობრივი, საზოგადოებრივი წესრიგის აღდგენის მიზნით შინაგან საქმეთა სამინისტრო იწყებს კანონმდებლობით გათვალისწინებული ღონისძიების განხორციელებას.
კიდევ ერთხელ მოვუწოდებთ აქციის ორგანიზატორებს, პოლიტიკური პარტიის ლიდერებს და მონაწილეებს, დაემორჩილონ სამართალდამცველების კანონიერ მოთხოვნებს.
სამინისტრო შეისწავლის აქციის მსვლელობისას მომხდარ ყველა კანონსაწინააღმდეგო ფაქტს და თითოეულ ქმედებას მისცემს შესაბამის სამართლებრივ შეფასებას“, - აღნიშნულია შსს-ს განცხადებაში.
- პოლიცია მომიტინგეების წინააღმდეგ წყლის ჭავლს გამოიყენა . მანამდე ადგილზე მყოფი აქციის მონაწილეები გააფრთხილეს დაშლის შესახებ, რომ წინააღმდეგ შემთხვევაში გამოყენებულ იქნებოდა სპეციალური საშუალებები.
მანამდე პოლიციამ პარლამენტთან ცრემლსადენი გაზი გაუშვა. ამასთან, სავარაუდოდ, მოხდა რეზინის ტყვიების გამოყენებაც. არიან დაშავებულები, რომლებსაც სასწრაფო დახმარების ბრიგადები პირველად დახმარებას ადგილზე უწევენ.
მანამდე პარლამენტის უკანა შესასვლელთან პოლიციამ ე.წ. წიწაკის სპრეი კიდევ რამდენჯერმე გამოიყენა. ტერიტორიაზე დაპირისპირება გრძელდება, ვითარება კვლავ არასტაბილურია. აქციაზე რამდენიმე მოქალაქე დაშავდა. მათ პირველად სამედიცინო დახმარებას სასწრაფო სამედიცინო დახმარების ექიმები უწევენ. ადგილზე სასწრფო დახმარების რამდენიმე ბრიგადა მუშაობს.
ნახეთ ასევე: