"ცასთან ახლოს": როგორი იქნება მსოფლიოს ყველაზე მაღალი საცხოვრებელი კოშკი, სადაც ფეშენებელური პენტჰაუსები მილიონობით დოლარი ეღირება - ფოტოები

დუბაიში მსოფლიოში ყველაზე მაღალი საცხოვრებელი კოშკი შენდება. უზარმაზარი შენობა 122 სართულსა და 251 საცხოვრებელს მოიცავს. ძვირადღირებული სასტუმრო ბრენდის Six Senses-ის მიერ შექმნილი რეზიდენცია, მათი თქმით, "ჯანსაღად ცხოვრებას ხელახლა განსაზღვრავს".

დუბაი მარინაში განთავსებულ კოშკში საცხოვრებელი ბინების ფასი 1.57 მილიონი დოლარიდან იწყება. ფასები, რაღა თქმა უნდა, ბინების ზომებითა და საძინებლების რიცხვით განისაზღვრება, რომელიც 2-4-მდე მერყეობს. ყველაფერი აქ არ მთავრდება, რეზიდენციაში იქნება ოთხოთახიანი პენტჰაუსები და ძვირადღირებული "ცის სასახლეების" კოლექციაც კი, რომლებსაც 4-5-საძინებლიანი კონფიგურაცია აქვთ.

ყველა იმ ადამიანს, ვინც ამ მდიდრული ბინებიდან ერთ-ერთს მაინც შეიძენს, ოთხ სართულზე გადანაწილებულ "კეთილდღეობის ობიექტებზე" ექნება წვდომა, მათ შორის კრიოთერაპიის კაბინებზე, ბუნებრივი ქვებით მკურნალობის ოთახებსა და სპაზე.

122-სართულიანი კოშკის ყველაზე თვალშისაცემი ნაწილი 109-ე სართულზე მოწყობილი "ცის გემბანია". აქ მობინადრეებს 25-მეტრიანი აუზით სარგებლობა შეუძლიათ, რომელსაც სპეციალურად შექმნილი გემბანი აქვს იოგასთვის და განსაცვიფრებელი შესახედაობის ბაღებს გადაჰყურებს, ეს ყველაფერი დუბაის ლამაზი ხედებით ტკბობის პარალელურად.

მათ, ვისაც აქტივობები და გართობა უფრო იზიდავთ, მსოფლიოს ყველაზე მაღალი საცხოვრებელი კოშკი თამაშების ოთახს, კინოთეატრს და სოციალიზაციისთვის განკუთვნილ სხვა ლაუნჯებს სთავაზობთ.

დუბაიში ამ განსაცვიფრებელი რეზიდენციების მშენებლობის დასრულება 2028 წლისთვისაა დაგეგმილი.

წყარო: thesun

მოამზადა: ანა სიბოშვილმა