სამწუთიანი ჩანაწერის გამო მკაცრად დასჯილი რუსი გენერალი - რატომ დააკავეს პოპოვი?
რუსეთის 58-ე არმიის ყოფილი მეთაური, გენერალ-მაიორი ივან პოპოვი თაღლითობის ბრალდებით დააკავეს. გასულ ზაფხულს პოპოვმა პირადად განაცხადა, რომ ის თანამდებობიდან "უფროსმა სარდლობამ" გადააყენა და ისაუბრა უკრაინის ომში არმიის პრობლემებზე.
რას ამბობენ წყაროები
პოპოვის დაკავების შესახებ TASS-მა ინფორმაცია საკუთარ წყაროებზე დაყრდნობით გაავრცელა. როგორც სააგენტოს ადვოკატმა სერგეი ბუინოვსკიმ განუცხადა, გენერალი ბრალს არ აღიარებს. დაკავების შესახებ ინფორმაცია პირველად სამხედრო "ტელეგრამ" არხებზე გავრცელდა.
ერთ-ერთი არხის ინფორმაციით, პოპოვის წინააღმდეგ საქმე სისხლის სამართლის კოდექსის 159-ე (ორგანიზებული ჯგუფის მიერ ჩადენილი ან მასშტაბური თაღლითობა) მუხლით არის აღძრული. გამოძიება 17 მაისს FSB-ის მასალებზე დაყრდნობით დაიწყო.
რატომ დატოვა თანამდებობა 58-ე არმიის მეთაურმა?
გასულ ივლისში, 58-ე არმიის მეთაურმა განაცხადა, რომ იგი თანამდებობიდან გადააყენეს. მაშინ გენერალ-მაიორს „მტრების“ კონკრეტული სახელები არ დაუსახელებია. ომის მომხრე ბლოგერები წერდნენ, რომ პოპოვი გენშტაბის უფროსის ვალერი გერასიმოვის მოხსენების შემდეგ გადააყენეს.
- მანამდე გავრცელდა გენერალ-მაიორ პოპოვის მიმართვა, სადაც ის რუსული არმიის პრობლემებზე საუბრობს. ჩანაწერი სახელმწიფო სათათბიროს დეპუტატმა ანდრეი გურულევმა გამოაქვეყნა. BBC-ის წყაროების თანახმად, სწორედ ეს ჩანაწერი გახდა პოპოვის თანამდებობიდან გათავისუფლების მიზეზი. სამწუთიან აუდიო ჩანაწერში პოპოვი სამხედროებს მიმართავს და მათ "ჩემს გლადიატორებს" უწოდებს, საკუთარ თავს კი "სპარტაკს".
პოპოვის წინააღმდეგ მიმდინარე გამოძიება მესამე გახმაურებული სისხლის სამართლის საქმეა რუსეთში, რომელიც მაღალი რანგის სამხედრო მოსამსახურეების წინააღმდეგ აღიძრა.
24 აპრილს მოსკოვის ბასმანის სასამართლომ თავდაცვის მინისტრის მოადგილე ტიმურ ივანოვი დააკავა. გამომძიებლების თქმით, მან განსაკუთრებით დიდი რაოდენობის ქრთამი, დაახლოებით 1 მილიარდი რუბლი აიღო.
14 მაისს ცნობილი გახდა, რომ რუსეთის თავდაცვის სამინისტროს პერსონალის დეპარტამენტის უფროსი იური კუზნეცოვი ასევე ქრთამის აღების ბრალდებით დააკავეს.
სერგეი შოიგუს, რომელიც ბოლო დრომდე თავდაცვის მინისტრის პოსტს იკავებდა, დაკავებებზე კომენტარი არ გაუკეთებია. რუსეთის პრეზიდენტის ინაუგურაციის შემდეგ შოიგუ უშიშროების საბჭოს მდივანი გახდა, მისი ადგილი კი ანდრეი ბელუსოვმა დაიკავა.
რა არის ცნობილი გენერალ პოპოვის შესახებ?
გადადგომის დროს გენერალი, სავარაუდოდ, ძალიან პოპულარული იყო ჯარში და 58-ე არმია, რომელსაც მაშინ მეთაურობდა, იცავდა რაბოტინოს რაიონს, სადაც უკრაინის შეიარაღებული ძალების კონტრშეტევა მოხდა.
პოპოვის დემარში ევგენი პრიგოჟინის აჯანყების შემდეგ მოხდა, რომელიც ღიად დაუპირისპირდა თავდაცვის მინისტრ შოიგუს და გენერალური შტაბის უფროსს ვალერი გერასიმოვს. ასე რომ, პოპოვის გადაყენებისას ექსპერტების ნაწილმა მომხდარი დამოუკიდებელი მეთაურებისგან არმიის გაწმენდად აღიქვეს.
როგორც მაშინ გავრცელდა ინფორმაცია, გადადგომის შემდეგ, არმიის ყოფილი მეთაური სამსახურის გასაგრძელებლად სირიაში გაგზავნეს. თუმცა, დაკავების შესახებ გავრცელებული ინფორმაციით თუ ვიმსჯელებთ, დემარში არ აპატიეს, თუმცა სისხლის სამართლის საქმის დაწყებას თითქმის ერთი წელი დასჭირდა.
წყარო: BBC