რამზან კადიროვის 18 წლის ვაჟი, სპორტის რეგიონულ მინისტრად დანიშვნის შემდეგ, საფეხბურთო კლუბ "ახმატის" პრეზიდენტი გახდა

ჩეჩნეთის ლიდერის, რამზან კადიროვის ერთ-ერთმა უახლოესმა ადამიანმა და თანამოაზრემ, მაგომედ დაუდოვმა, გროზნოს საფეხბურთო კლუბ "ახმატის“ (გროზნო) პრეზიდენტის პოსტი დატოვა. გადაწყვეტილების ზუსტი მიზეზი ჯერჯერობით უცნობია. ამ დროისთვის, იგი ოფიციალურად ინარჩუნებს რეგიონული შტაბის უფროსის თანამდებობას.

• დაუდოვმა კლუბიდან წასვლის შესახებ "ტელეგრამის" არხზე დაწერა - მან ხაზი გაუსვა, რომ გადადგომის მიუხედავად ის "განზე არ დგას“ და კლუბში დაგროვებულ გამოცდილებას სხვებს გაუზიარებს.

როგორც ცნობილია, საფეხბურთო კლუბ "ახმატის“ ახალი პრეზიდენტი რამზან კადიროვის 18 წლის ვაჟი, ახმატ კადიროვი გახდა, რომელიც გუშინ სპორტის რეგიონულ მინისტრად დაინიშნა. ამ პოსტზე მისი პირველი მოადგილე უმარ დაუდოვი იქნება, რომელიც ამავე თანამდებობას იკავებს კულტურისა და სპორტის სამინისტროში. გენერალურ დირექტორად დარჩა რამზან კადიროვის მეუღლის ძმა ახმედ აიდამიროვი.

მაგომედ დაუდოვმა გასულ კვირას რესპუბლიკის პარლამენტის თავმჯდომარის თანამდებობაც დატოვა და განაცხადა, რომ გადაწყვეტილება რამზან კადიროვთან საუბრის შემდეგ მიიღო. ჩეჩნეთის ლიდერის თქმით, მისი უახლოესი მოკავშირე "აუცილებლად შეძლებს გამოიყენოს თავისი არაჩვეულებრივი ლიდერობის ნიჭი სხვა სფეროში“.

ჩეჩნეთში საჯარო სამსახურის თანამდებობებს იკავებენ კადიროვის შვილები, მისი დები, სიძეები, ძმისშვილები და სხვა ნათესავები.