"აფხაზეთი რეალისტურად არ მიიჩნევს სცენარს, რომლის მიხედვითაც, საქართველოსა და აფხაზეთს შორის კონფედერაციული ურთიერთობები შეიქმნება" - სერგეი შამბა
ბოლო პერიოდში საქართველოში განვითარებულ მოვლენებს ყურადღებით აკვირდებიან რუსეთის მიერ ჩვენს ოკუპირებულ რეგიონში, აფხაზეთში. ე.წ. აგენტების კანონპროექტთან დაკავშირებით კი როგორც რუსეთში, ასევე აფხაზეთში სხვადასხვა ბლოგერები წერენ, რომ შესაძლოა, ყველაფერი აფხაზეთისა და საქართველოს ტერიტორიული მთლიანობის აღდგენის საკითხს უკავშირდებოდეს.
აფხაზი ბლოგერის ინალ ჰაშიგის მიერ გამოქვეყნებულ სტატიაშიც მსგავსი მოსაზრებაა წამოწეული წინა პლანზე.
"ქუჩაში 100 000 ადამიანი გამოვიდა, ჩემი აზრით, ხელისუფლებისთვის ასეთ რისკზე წასასვლელად საჭიროა მიზეზი და ეს მიზეზი ივანიშვილისთვის არის აფხაზეთი", - აღნიშნავს ჰაშიგი. სტატიაში წერს, რომ მისი აზრით, მმართველი გუნდისთვის "აგენტების კანონპროექტის" კვლავ დაბრუნებამდე ვითარება კომფორტული იყო, ოპოზიცია ფრაგმენტული ჩანდა და "ქართული ოცნების" გამარჯვებას შემოდგომაზე დაგეგმილ საპარლამენტო არჩევნებში გარდაუვალ ფაქტად წარმოაჩენდა.
- "კრემლისთვის, რომელიც თავის ირგვლივ ერთგვარ უსაფრთხოების ზონას აშენებს, საქართველოს აფხაზეთთან და სამხრეთ ოსეთთან კონფედერაციის იდეა ძალიან მომგებიანი პროექტია, რომელიც გარანტიას იძლევა ასეთი გაერთიანების მეშვეობით, საქართველო რუსეთს მიაბას", - წერს ბლოგერი.
მიუხედავად იმისა, რომ ზოგიერთი ექსპერტი ამ ყველაფერს შეთქმულების თეორიას უწოდებს, რეალურად მოსაზრება, რომ კონფედერაციის საკითხი აფხაზეთში საზოგადოების განხილვის თემაა. ამ საკითხზე განცხადება გააკეთა ოკუპირებული რეგიონის ე.წ. უშიშროების საბჭოს მდივანმა, სერგეი შამბამ. მისი თქმით, სცენარის ამგვარ განვითარებას რეალისტურად არ მიიჩნევენ.
- "აფხაზეთი რეალისტურად არ მიიჩნევს სცენარს, რომლის მიხედვითაც, საქართველოსა და აფხაზეთს შორის კონფედერაციული ურთიერთობები შეიქმნება", - აცხადებს შამბა.
მისი თქმით, მოსაზრება, რომ თითქოს რუსეთის ფედერაციას სურს, უარი თქვას აფხაზეთის დამოუკიდებლობის აღიარებაზე და შექმნას საქართველოსა და აფხაზეთის კონფედერაცია, ბევრი ექსპერტის მიერ ჩამოყალიბდა საქართველოში შექმნილი ვითარების გამო.
"ეს ფაბრიკაციაა, რა თქმა უნდა, სიტუაციის განვითარების სხვადასხვა ვარიანტები უნდა განვიხილოთ, თუმცა მსგავს რამეს რეალისტურად არ მივიჩნევთ. ჩვენ მაინც ვიმედოვნებთ, რომ ეს იქნება სხვა ფორმატი, სხვა ინტეგრაცია, უფრო სამეკავშირეო სახელმწიფო (რუსეთთან და ბელარუსთან)", - ამბობს სერგეი შამბა.