სკანდალი ავტო ინდუსტრიაში - აშშ-ის კონგრესში ამბობენ, რომ BMW და Jaguar-ი აკრძალულ ჩინურ ავტონაწილებს იყენებდნენ
აშშ-ის კონგრესის მოხსენების თანახმად, BMW-მ აშშ-ში სანქცირებული ჩინური კომპანიის მიერ მიწოდებული ელექტრონული კომპონენტებით წარმოებული 8,000 Mini Cooper-ი შეიყვანა. სენატის ფინანსური კომიტეტის თავმჯდომარის, რონ ვაიდენის განმარტებით, აღნიშნულ ჩინურ კომპანიასთან საქმიანობის წარმოება 2021 წელს მიღებული კანონპროექტით აიკრძალა. აღსანიშნავია, რომ ამ წარმოების ელექტრონული კომპონენტების გამოყენება იძულებით შრომასთან სავარაუდო კავშირების გამოა აკრძალული.
მომხდართან დაკავშირებით განცხადება გაავრცელა BMW Group-მაც და აღნიშნა, რომ მას აქვს "მკაცრი სტანდარტები და პოლიტიკა დასაქმების პრაქტიკასთან, ადამიანის უფლებებთან და სამუშაო პირობებთან დაკავშირებით, რომლებიც უნდა დაიცვას ყველა პირდაპირმა მომწოდებელმა", კომპანიის თქმით, იმპორტირების შესაჩერებლად შესაბამისი ზომები უკვე მიიღეს.
- სენატის ანგარიშის თანახმად, კალიფორნიულმა კომპანია Bourns Inc-მა ავტონაწილები სწორედ ჩინური სანქცირებული კომპანია JWD-სგან შეიძინა და აშშ-ში იმპორტი განახორციელა. მოგვიანებით, Bourns Inc-მა იმპორტირებული ავტონაწილები კომპანია Lear Corp-ს გადასცა, რომელიც BMW-სა და Jaguar Land Rover-ის მიმწოდებელია.
იაგუარ ლენდ როვერის წარმომადგენელმა BBC-ს განუცხადა, რომ "ადამიანის უფლებების და იძულებითი შრომის საკითხებს სერიოზულად ეკიდება და აქვს მონობის საწინააღმდეგო ღონისძიებების აქტიური მიმდინარე პროგრამა“.
კონგრესმა 2021 წელს მიიღო იძულებითი შრომის პრევენციის აქტი (UFLPA). კანონმდებლობა მიზნად ისახავს ჩინეთის ჩრდილო-დასავლეთ სინძიანის რეგიონიდან იმ საქონლის იმპორტის აღკვეთას, რომელიც, სავარაუდოდ, იძულებითი შრომის პირობებში დამზადდა.