მიწაში დამარხული 1000-ზე მეტი სახლი და ასობით დაღუპული ადამიანი - პაპუა-ახალ გვინეაში მეწყერმა კატასტროფული შედეგები გამოიწვია (ფოტოები)

პაპუა-ახალი გვინეის ენგას პროვინციაში მასიური მეწყრის შედეგად ასობით ადამიანი დაიღუპა, დაზიანებულია სოფლებთან მისასვლელი გზაც. მეწყერი ხუთშაბათს, ადგილობრივი დროით 03:00 საათზე ჩამოწვა. შემთხვევის შედეგად ენგას მაღალმთიანეთში ასობით სახლი დაიმარხა. გაურკვეველია რამდენი ადამიანია ნანგრევების ქვეშ მოყოლილი.

რთული რელიეფი და ძირითადი გზების დაზიანება ართულებს სამაშველო სამუშაოებს. გზატკეცილზე მისასვლელი დაბლოკილია და ადგილზე მიღწევა მხოლოდ ვერტმფრენითაა შესაძლებელი. იმ ტერიტორიაზე, სადაც მეწყერი ჩამოწვა, დაახლოებით 4000 ადამიანი ცხოვრობს.

ამოს აკემმა, ენგას პროვინციის დეპუტატმა განაცხადა რომ, „მეწყერმა დამარხა 300-ზე მეტი ადამიანი და 1,182 სახლი“. გაეროს ოფიციალური წარმომადგენლის სერჰან აქტოპრაკის თქმით, მეწყრის შედეგად დაზარალებული ტერიტორია ოთხი ფეხბურთის მოედნის ზომას უტოლდება.

წყარო: BBC