"ვისარიონ აპლიამ ულტიმატუმი წაუყენა რუსეთის პატრიარქ კირილს, მაგრამ კირილისგან პასუხი არ არის" - რას წერს მედია ოკუპირებული აფხაზეთის ეკლესიის წინამძღვარზე
ოკუპირებული აფხაზეთის მართლმადიდებლური ეკლესიის (AOC) ეპარქიის წინამძღვარმა, მამა ვისარიონ აპლიამ რუსეთის პატრიარქ კირილეს ულტიმატუმი წაუყენა: ის აფხაზეთის ეკლესიის რუსეთის ეკლესიის მფარველობის ქვეშ მოხვედრას, კანონიკური სტრუქტურის საკითხის მოგვარებასა და აფხაზური დიასპორისთვის მოსკოვში ტაძრის გამოყოფას ითხოვს - ინფორმაციას "Независимая газета" ავრცელებს. მამა ვისარიონის თქმით, მან პატრიარქს უკვე გაუგზავნა თავისი მოთხოვნები, თუმცა პასუხი ჯერ არ მიუღია.
აფხაზეთში მართლმადიდებლური სტრუქტურების სახით ფუნქციონირებს ორი არაღიარებული ეკლესია – აფხაზეთის მართლმადიდებლური ეკლესია მამა ვისარიონ აპლიას მეთაურობით და აფხაზეთის წმინდა მიტროპოლია არქიმანდრიტ დოროფეი დბარის მეთაურობით.
- "ჩვენ არ ვართ საქართველოს ეკლესიის ნაწილი, ჩვენ ვართ რუსეთის ეკლესიის ნაწილი, როგორც პატრიარქმა ტიხონმა გადაწყვიტა კრებაზე. კანონიკურად, სწორ მხარეს ვართ. მაგრამ მოსკოვში ბევრი გავლენიანი ქართველი გვეწინააღმდეგება", - ამბობს აპლია.
როგორც გამოცემა წერს, მანამდე აპლია პატრიარქ კირილს მოსკოვში შეხვდა და თავისი მოთხოვნები გააცნო. პატრიარქმა კი აფხაზ სასულიერო პირებში ერთიანობის ნაკლებობას გაუსვა ხაზი:
"პატრიარქმა შეხვედრაზე მითხრა: ჯერ თქვენ შორის გადაწყვიტეთ. თორემ, ზოგს კონსტანტინოპოლში წასვლა უნდა, ზოგს საქართველოში", - ამბობს ვისარიონი.
მოგვიანებით, როცა მამა ვისარიონი მოსკოვში აფხაზეთის ე.წ. პრეზიდენტ ასლან ბჟანიასთან და ე.წ. პარლამენტის თავმჯდომარე ლაშა აშუბასთან ერთად აპირებდა გამგზავრებას კირილთან შესახვედრად, აუდიენცია რუსეთის მართლმადიდებლური ეკლესიის ბრძანებით გაუქმდა. შეხვედრის ჩაშლის შემდეგ, ვისარიონმა პატრიარქს წერილობით მიმართა. რუსეთის მართლმადიდებლური ეკლესიისგან ოფიციალურ პასუხამდე აპლია უარს ამბობს მედიასთან დამატებითი კომენტარის გაკეთებაზე.
- აფხაზეთის ე.წ. უშიშროების საბჭოს მდივანმა სერგეი შამბამ განაცხადა, რომ ის პირადად ყველაფერში მხარს უჭერს აპლიას, მაგრამ საეკლესიო საკითხებში ნეიტრალიტეტს ამჯობინებს. შამბას თქმით, აფხაზეთის ოფიციალურ პირებს შორის არიან როგორც აპლიას, ასევე არქიმანდრიტ დოროთეოსის (დბარის) მომხრეები. დოროთეოსი აპლიას ყოფილი მოსწავლეა და დიდი ხანია ცდილობს მსოფლიო პატრიარქისგან აღიარების მიღებას.