ევროპაში აზერბაიჯანული გაზი რუსულს სრულად ჩაანაცვლებს? - რას წერს Bloomberg
ევროპა რუსული გაზის აზერბაიჯანულით ჩანაცვლებას გეგმავს - ამის შესახებ გამოცემა Bloomberg სხვადასხვა წყაროზე დაყრდნობით წერს. უკრაინის ტერიტორიით ევროპაში რუსული გაზის ტრანზიტის შესახებ კონტრაქტი წლის ბოლოს იწურება.
როგორც ცნობილია, კიევი არ გეგმავს რუსულ გაზპრომთან ხელშეკრულების განახლებას. ამასთან, უკრაინული კომპანია "ნაფტოგაზის" წარმომადგენელმა ალექსეი ჩერნიშოვმა განაცხადა, რომ უკრაინას აქვს ტრანზიტისთვის საჭირო ყველა ინფრასტრუქტურა.
ქვეყანა, რომელიც ისარგებლებს ევროპისთვის აზერბაიჯანული გაზის მიწოდებით, სლოვაკეთი იქნება, აღნიშნავს Bloomberg . გამოცემის ცნობით, სლოვაკეთის პრემიერ-მინისტრმა რობერტ ფიკომ ტრანზიტის შესაძლებლობაზე მაისში ბაქოში ვიზიტის შემდეგ ისაუბრა.
მისივე თქმით, შეთანხმების მიღწევის შემთხვევაში, სლოვაკეთს შეეძლება აზერბაიჯანიდან გაზის იმპორტი - ნაწილს თავისთვის შეინახავს, დანარჩენს კი სხვა ქვეყნებში გაგზავნის.
ამასთან, რუსული გაზის აზერბაიჯანული გაზით ჩანაცვლების გადაწყვეტილება შესაძლოა, წლის ბოლომდე არ მიიღონ.
რუსული გაზის უკრაინის გავლით ევროპაში ტრანზიტის ხუთწლიანი კონტრაქტი 2019 წელს გაფორმდა. უკრაინამ გაზპრომთან ხელშეკრულების განახლებაზე კატეგორიული უარი თქვა.