რუსული ფლოტი ფლორიდის სანაპიროსთან სულ რაღაც 300 კმ-ში - რას მოიცავს კუბაში შესული არმადა და რის მიღწევა სურს რუსეთს ძალის დემონსტრირებით?
ოთხმა რუსულმა სამხედრო ხომალდმა, მათ შორის, ბირთვულმა წყალქვეშა ნავმა, ატლანტის ოკეანეში დაგეგმილი სამხედრო წვრთნების წინ კუბამდე მიაღწია და ამჟამად ფლორიდის სანაპიროდან მხოლოდ 200 მილის (დაახლოებით 300კმ) დაშორებით იმყოფება.
- ფლოტი - რომელიც ფრეგატის, ატომური წყალქვეშა ნავის, ნავთობის ტანკერისა და საბუქსირო-სამაშველო გემისგან შედგება, ჰავანის ყურეში ოთხშაბათს შევიდა და კუბამ 21 ზარბაზნის გასროლით მიიღო, რაც უმაღლესი პატივის მიგებას აღნიშნავს.
ფლოტის ყურეში შესვლის ამსახველ კადრებში ჩანს უზარმაზარი გემები, ისევე, როგორც კუბელები, რომლებიც კრემლის საზღვაო ძალებისთვის სურათების გადასაღებად ქუჩებში გამოვიდნენ.
ზოგიერთი სამოქალაქო პირი რუსულ დროშაში იყო გახვეული, ხოლო ფრეგატი, თავის მხრივ, კრემლისა და კუბის ფერებს აფრიალებდა, მისი მეზღვაურები კი კუნძულოვან სახელმწიფოსთან მიახლოებისას სამხედრო წყობით იდგნენ.
კუბაში მყოფი წყალქვეშა გემი იდენტიფიცირებულია, როგორც "ყაზანი", იასენის კლასის ატომური საკრუიზო სარაკეტო წყალქვეშა გემი.
ჩვეულებრივ, ეს წყალქვეშა გემი "ცირკონის" ჰიპერბგერითი რაკეტებითაა აღჭურვილი, თუმცა რუსულ სამთავრობო საინფორმაციო სააგენტო TASS-ი წერს, რომ უცნობია, ამჟამად აქვს თუ არა"ყაზანს" ამგვარი შეიარაღება.
- ამასთან, აშშ-ისა და კუბის ოფიციალურმა პირებმა განაცხადეს, რომ მიუხედავად იმისა, რომ წყალქვეშა გემი ბირთვული ძრავით მუშაობს, მას ბირთვული იარაღი არ გადააქვს.
სახელმწიფო უსაფრთხოების მრჩეველმა, ჯეიკ სალივანმა ჟურნალისტებს განუცხადა, რომ აშშ ყურადღებით აკვირდება რუსეთის სამხედრო წვრთნებს ატლანტის ოკეანეში და დასძინა, რომ არ არსებობს მტკიცებულება იმისა, რომ რუსეთი კუბაში რაკეტებს განათავსებს.
ექსპერტები თვლიან, რომ წვრთნები კრემლის მხრიდან ძალის დემონსტრირებაა მას შემდეგ, რაც აშშ-მ უკრაინას ნება დართო, ამერიკული წარმოების იარაღი რუსეთის ტერიტორიაზე ხარკოვის, უკრაინის მეორე უდიდესი ქალაქის დასაცავად გამოეყენებინა.
რუსული გემები და წყალქვეშა ნავები ჰავანაში 2008 წლიდან, რუსეთის სამხედრო წვრთნების ფარგლებში დგანან. აშშ-ის ოფიციალური პირების მოლოდინით, ხომალდების უახლესი ნაკადი რეგიონში ზაფხულის განმავლობაში დარჩება და შესაძლოა, დროებით ვენესუელაშიც გაჩერდეს.
ნახეთ ასევე: