ნიანგი, რომელიც ავსტრალიაში მთელ ქალაქს ატერორებდა, მოსახლეობამ მოკლა და შეჭამა

ოთხშაბათს პოლიციამ ავსტრალიის ქალაქ ბულაში მოკლა ნიანგი, რომელიც ქალაქს რამდენიმე თვის განმავლობაში ატერორებდა. ადგილობრივების თქმით, 3,6- მეტრიანმა ნიანგმა შინაური ცხოველები შეჭამა და ბავშვებისაც დასდევდა. ცხოველის მოკვლის შემდეგ, ადგილობრივებმა იგი "ტრადიციული წესით მოამზადეს წვეულებისთვის" და შეჭამეს.

საზოგადოებრივი მაუწყებლის ABC-სთან საუბრისას პოლიციის სერჟანტმა ენდრიუ მაკბრაიდმა განაცხადა, რომ "ნიანგის კუდის წვნიანი მოამზადეს, დარჩენილი ნაწილებისგან კი მწვადი შეწვეს, ზოგი კი ბანანის ფოტოში გაახვიეს და მოხარშეს".

ავსტრალიაში ნიანგებზე ნადირობა კანონით იკრძალება. ბოლო წლების განმავლობაში მათი რაოდენობა საგრძნობლად გაიზარდა. ჩრდილოეთ ტერიტორიაზე ახლა დაახლოებით 100,000 ნიანგი ცხოვრობს. ტერიტორიის ვებსაიტზე აღნიშნულია, რომ მარილიანი წყლის ნიანგები ექვს მეტრამდე (20 ფუტი) იზრდებიან, იწონიან ტონამდე და „ჭამენ ყველაფერს".

აპრილში, ნიანგმა 16 წლის ბიჭი შეჭამა. შემთხვევა ჩრდილოეთ კუინზლენდში მოხდა. ბიჭს ნავი გაუფუჭდა და ნაპირზე გაცურვას ცდილობდა. გასულ წელს, ნიანგის მუცლიდან 64 წლის მეთევზის ნაშთები ამოიღეს.