მანქანის დაქირავების ხელოვნება

ბლოგისთვის ამ სათაურის შერჩევა ნამდვილად არ ყოფილა შემთხვევითი, რადგან, ერთი დიდი ხელოვნებაა დაიქირავო ისეთი ავტომობილი, რომელიც დააკმაყოფილებს მანქანის გამართული ფუნქციონირებისთვის საჭირო ყველა პარამეტრს, მოგემსახურება ერთგულად, შეგიმცირებს სამოგზაურო თუ, საჭიროების შემთხვევაში, უბრალოდ A პუნქტიდან B პუნქტამდე გადაადგილების ხარჯებს, უზრუნველყოფს კომფორტულად მგზავრობას და მოერგება შენი, როგორც დამქირავებლის კონკრეტულ მოთხოვნებს.

თუ საკუთარი ავტომობილი გყავს შესაძლოა ფიქრობდე, რომ მანქანის ქირაობა არასდროს დაგჭირდება, მაგრამ ხომ გაგიგია: ,, არასოდეს თქვა არასოდეს’’, მანქანების დაქირავება ხშირად საუკეთესო გამოსავალია ამ და სხვა შემთხვევებშიც. თუ აქამდე არ გისარგებლია მანქანის დაქირავების სერვისით, მოგიყვები: რის მიხედვით უნდა აარჩიო დასაქირავებელი მანქანა, რას უნდა მიაქციო ყურადღება და რაც მთავარია, სად უნდა იპოვო სასურველი მონაცემების ავტომობილი.

პირველ ეტაპზე განვიხილოთ ის მიზეზები, რის გამოც ხშირად იყენებენ მანქანების გაქირავების სერვისს.

• ავტომობილის დაქირავება მოგზაურობის მიზნით - საქართველო ნამდვილად წარმოადგენს ტურიზმისა და აქტიური დასვენების საოცარ მხარეს:მრავალფეროვანი ბუნება, ზაფხულისა და ზამთრის კურორტები, მდიდარი კულტურული მემკვიდრეობა, თითეული კუთხისთვის დამახასიათებელი გამორჩეული იდენტობა, საოცარი ტრადიციული კერძები, ადგილობრივი მოსახლეობის სტუმართმოყვარეობა - ყოველივე აღნიშნული მიმზიდველია, როგორც ტურისტებისთვის, ასევე ჩვენთვის, საქართველოში მაცხოვრებელთათვის.შესაბამისად, მოგზაურობის მიზნით ავტომობილის ქირაობა ძალიან აქტუალურია, როგორც ტურისტებისთვის, ასევე ადგილობრივი მოსახლეობისთვის. ქალაქებს შორის გადაადგილება საზოგადოებრივი ტრანსპორტითაც შესაძლებელია, თუმცა მათი მარშრუტები საკმაოდ შეზღუდულია და თან არც ისე კომფორტულია, ამასთან ტურისტული ადგილების სრულყოფილად დათვალიერებასა და აღქმას ავტობუსითა და სამარშრუტო ტაქსით ვერ შეძლებ, სწორედ აქ დგება მანქანების დაქირავების სერვისის მნიშვნელოვანი როლი. ტურისტებისთვის ავტომობილის დაქირავება არის მოხერხებული და ბიუჯეტური საშუალება იმოგზაურონ და აღმოაჩინონ ჩვენი ქვეყნის უნიკალური კუთხეები მათი გეგმის, ტემპისა და საჭიროებისამებრ.იმის მიხედვით თუ სად სურთ გადადგილება შეუძლიათ იქირავონ სხვადასხვა ტიპისა და ზომის მანქანები - მცირე ზომის ავტომობილები ქალაქებსა და შიდა გზებზე გადასაადგილებლად, ხოლო დიდი ჯიპები, დელიკები მთიანი რეგიონების ასათვისებლად.იგივე მიზეზით - ოჯახური და ჯგუფური მოგზაურობისთვის

ქირაობენ ადგილობრივებიც ავტომობილს, მიუხედავად იმისა, რომ შესაძლოა სახლში ერთი მანქანა მაინც ყავდეთ, ხშირად, შორ მანძილზე გადაადგილებისას დიდი მანძილისა და ცვეთის გამო უპირატესობას მანქანის ქირაობას ანიჭებენ.

• ავტომობილის დაქირავება ბიზნეს მოგზაურობისთვის - ზოგჯერ ადამიანებს სამსახურიდან გამომდინარეუწევთ ხშირი მივლინებები ან რიგი ღონისძიებების ჩატარება სხვადასხვა ქალაქებში. ამ დროს, მანქანის ქირაობა უფრო პრაქტიკული და სანდო გზაა, ვიდრე საკუთარი ავტომობილის გამოყენება, განსაკუთრებით კი თუ გრძელი მანძილია გასავლელი.
• ავტომობილის დაქირავება დამატებითი შემოსავლის მიზნით - ავტომობილის გრძელვადიანად დაქირავება დამატებითი ან ძირითადი შემოსავლის წყარო ხდება იმ ადამიანებისთვის ვისაც საკუთარი მანქანა არ ყავს, მაგრამ სურს ტაქსის სერვისზე მუშაობა, ან სხვადასხვა მიზნით მძღოლად დასაქმება.ასეთი საქმიანობებისას უპირატესობას ბიუჯეტურ ავტომობილებს ანიჭებენ, რომელიც ნაკლებ ბენზინს მოიხმარს, ძირითადად ჰიბრიდულს, რაც ზოგავს საწვავისთვის განკუთვნილ საკმაოდ სოლიდურ თანხას.
• ავტომობილის დაქირავება განსაკუთრებული დღეებისთვის - ქართულ კულტურაში დიდი როლი და განსაკუთრებული მნიშვნელობა აქვს ისეთ ცერემონიებს, როგორიცაა: ქორწილი, ნათლობა, დაბადების დღეები და სხვა ტიპის შეკრებები.ასეთი დღეების ორგანიზებისას კი ავტომობილების დაქირავება მნიშვნელოვან ნაწილს წარმოადგენს, სტუმართა რიცხოვნობის მიხედვით ირჩევა ავტომობილების რაოდენობა და ტიპი - მანქანები, მინივენები, მიკროავტობუსები და ა.შ. ორგანიზატორები დეტალურად განსაზღვრავენ მგზავრობის დროსა და მარშრუტს, ზოგიერთ შემთხვევაში კი ავტომობილების გაფორმებაც ხდება სიტუაციის შესაბამისად.მაგალითად: ქორწილისთვის შესაფერისი დეკორით - ლენტებით, ყვავილებით და ა.შ. ავტომობილთან ერთად აქტიურად იყენებენ მძღოლის დაქირავების სერვისსაც.
• ავტომობილის დაქირავება დროებითი ჩანაცვლების მიზნით - გაუთვალისწინებელი შემთხვევებისას, როცა ავტომობილი ფუჭდება და ხელოსანთან გვიწევს შესაკეთებლად დატოვება, ხშირად არაპრაქტიკული და დისკომფორტის შემცველია სხვა ალტერნატივების ძებნა, ალტერნატივებში ვგულისხმობ საზოგადოებრივი ტრანსპორტით სარგებლობას ან ტაქსებს.როცა ავტომობილით სიარულს ხარ მიჩვეული საზ.ტრანსპორტის რიტმს ვეღარ ერგები, აღარ არის სასიამოვნო ხალხმრავლობასა და ჭყლეტვაში მოხვედრა, განსაკუთრებით თუ ე.წ პიკის საათებში გიწევს გადაადგილება,ასეთ დროს ერთგვარი გამოსავალია ტაქსები, მაგრამ საკმაოდ ძვირი სიამოვნებაა, ამიტომ იმ ადამიანებს ვისაც დროებითი ტრანსპორტი სჭირდებათ ყოველდღიურად გადაადგილებისთვის შეუძლიათ ისარგებლონ მანქანის დაქირავების სერვისით. შესალებელია ავტომობილის დღიურად და საათობრივად დაქირავება. ბევრად ბიუჯეტური დაჯდება და საკუთარი ავტომობილის დროებით ,,არ ყოფნის’’ სევდასაც გააქარვებს.
• ავტომობილის დაქირავება სხვადასხვა მოდელების გამოცდის მიზნით - თუ ჯერ საკუთარი ავტომობილი არ გყავს, შეძენას გეგმავ და ვერ გადაგიწყვეტია რომელზე შეაჩერო არჩევანი, საბოლოო გადაწყვეტილების მისაღებად ავტომობილის ქირაობა კარგ შესაძლებლობას გაძლევს, ამ გზით გამოცდი სხვადასხვა ტიპისა და მოდელის მანქანას, შეადარებ ერთმანეთს და იმ კონკრეტულს აირჩევ, რომელიც ყველაზე უკეთ მოერგება შენს ბიუჯეტსა და მოთხოვნილებებს.გარდა ამისა, უბრალოდ გართობისა და სიამოვნების მიღების მიზნითაც შეგიძლია საოცნებო ავტომობილების დაქირავება და გატესტვა.საქართველოში გასაქირავებელ ავტომობილებს შორის აღმოაჩენ "პორშესა" და "ბენტლსაც" კი.

ცხადია, ზემოთ აღნიშნული მიზნობრიობის გარდა, სხვა მიზეზებიც არსებობს რის გამოც ქირაობენ ავტომობილებს, მაგრამ სჯობს აქ შევჩერდეთ და გადავიდეთ უფრო საინტერესო ნაწილზე, გავიგოთ რა ძირითადი პირობებია გასათვალისწინებელი და რა გვჭირდება საქართველოში მანქანის დასაქირავებლად?

ავტომობილის დასაქირავებლად ყველა ქვეყანას თავისი წესები აქვს, გამონაკლისი არც საქართველოა.ქართულ ბაზარზე ავტომობილების გაქირავების სფეროში 100-ზე მეტი კომპანია და ათეულობით კერძო პირია დასაქმებული, თითეულს გაქირავების განსხვავებული წინაპირობები აქვს თუმცა მიუხედავად ამისა, არსებობს ის ძირითადი წესები რაც ყველასთვის საერთოა.საქართველოში ავტომობილის დასაქირავებლად დაგჭირდება:

• მართვისა და პირადობის მოწმობა ან პასპორტი - მანქანის დაქირავება თუ გინდა, შესაბამის დოკუმენტაციას უნდა ფლობდე, კერძოდ, თუ მსუბუქი ავტომობილის ქირაობას გეგმავ მოგთხოვენ B კატეგორიის მოწმობას, ხოლო შენი ვინაობის დასადასტურებლად პირადობის მოწმობას ან პასპორტს.
• მართვის გამოცდილება - აქ გულწრფელობას გირჩევ, რადგან გამოცდილების დასადგენად ტესტ-დრაივს არავინ ჩაგიტარებს, მაგრამ ყურადღებას მიაქცევენ მართვის მოწმობის გაცემის თარიღს, გაცემიდან მინიმუმ 2 წელი მაინც უნდა იყოს გასული და შესაძლოა საბაზისო კითხვებიც დაგისვან ავტომობილის მართვის გამოცდილებასთან დაკავშირებით.
• შესაბამისი ასაკი - მიუხედავად იმისა, რომ სრულწლოვნებად 18 წლიდან ვითვლებით და შეიძლება ითქვას, ამ პერიოდიდან „ჩვენი თავი ჩვენადვე გვეყუდნეს“ ეს ასაკი მანაქანის დაქირავებისას შესაძლოა არ დაგეხმაროს, ხშირ შემთხვევაში კერძო გამქირავებლები და კომპანიები თავს არიდებენ 21 წლამდე პირებზე ავტომობილების მიქირავებას.გააჩნია კომპანიას, თუმცა ძირითადად ავტომობილის გაქირავების შესახებ განცხადებებსაც რომ გადახედო და მოიკითხო, ავტმობილის დასაქირავებლად უნდა იყო 21 წლის ან მეტის.
• დეპოზიტის თანხა - ზოგი კომპანია ითხოვს დეპოზიტის თანხას, რაც ერთგვარად არის დაზღვევა კომპანიისთვის და მომხმარებლის ვალდებულებების შესრულების გარანტია.მაგალითად: საზღვრის უკანონო გადაკვეთა, სადღაც ავტომანქანის დატოვება, ავტომანქანის დაზიანება, მართვა მთვრალ მდგომარეობაში, ასეთი შემთხვევების დროს დეპოზიტი ასრულებს გარკვეულ დამცველობით ფუნქციას.

ზემოთ ჩამოთვლილის გარდა, არსებობს სხვა ვალდებულებებიც, რაც ავტომობილის ქირაობისას გეკისრება, თუმცა ეს დეტალები ყველა კომპანიისთვის განსხვავებულია და გირჩევ, დაქირავებამდე გაეცნო ყველა დოკუმენტაციას, თუ რაიმეს ვერ გაიგებ დაეკითხე გამქირავებელს ან ამ საქმეში გამოცდილ ადამიანს და ისე მიიღე საბოლოო გადაწყვეტილება.

რჩევების ნაწილზეც გადავიდეთ, მოგიყვები თუ რის მიხედვით უნდა შევარჩიოთ დასაქირავებელი ავტომობილი, რას მივაქციოთ ყურადღება და ზოგადი სტატისტიკაც გაგაცნობ, თუ რა მანქანებს ქირაობენ ყველაზე ხშირად საქართველოში.პირველ რიგში დავიწყოთ იმ ფაქტორების განხილვით, რაც დაგვეხმარება შევარჩიოთ ჩვენი მიზნების, ბიუჯეტისა და მოთხოვნების შესაფერისი ავტომობილი.

მე პირადად, ამ გასათვალისწინებელ ფაქტორებში პირველ ადგილს მივანიჭებდი მგზავრთა რაოდენობასა და ბარგის მოცულობას, ამ ინფორმაციის მიხედვით შეგიძლია განსაზღვრო თუ რა ტიპის და რამდენად დიდი ზომის ავტომობილი გჭირდება, მაგალითად: თუ მოგზაურობას გეგმავ და სამეგობროში ან ოჯახში ჩემი მსგავსი ადამიანი მოგეძებნება ვინც ორი დღიანი მოგზაურობისასაც კი, მინიმუმ 3 ჩემოდანს მიათრევს, გირჩევ ისეთი ავტომობილის შეარჩიო რომელსაც დიდი საბარგული ექნება.ოჯახებისთვის და დიდი ჯგუფებისთვის, შესაძლოა, მინივენი ან ვანი იყოს საუკეთესო არჩევანი.მგზავრების რაოდენობისა და ბარგის ინფორმაციის გაგების შემდგომ, მნიშვნელოვანია განვსაზღვროთ თუ რა მიზნით გვჭირდება მანქანა - ქალაქში გადასაადგილებლად, საგზაო მოგზაურობებისთვის, იქნებ სულაც ცხრა მთასა და ცხრა ზღვას იქეთ წასვლა გაქვს გეგმაში, ნებისმიერ შემთხვევაში გაითვალისწინე ყველაზე საბაზისო ფაქტორები - რელიეფი და გასავლელი მანძილი.თუ გრძელ მარშრუტზე გამგზავრება გიწევს, მაშინ უპირატესობა მიანიჭე კომფორტულ და ეკონომიურ მანქანებს, თუ შენი გეგმები მოიცავს ბუნებაში მოგზაურობას, ეკოტურიზმს,აქტიურ დასვენებას და მთიან და ქვა-ღორღიან რელიეფზე მოგიწევს გადაადგილება აირჩიე მაღალი გამავლობის მანქანა.ჩავთვალოთ, რომ გავარკვიეთ მგზავრობის მიზანიც, ადამიანების რაოდენობაც და მარშრუტიც, რა გვრჩება გასარკვევი? Სწორია, ფინანსური ნაწილი, უნდა განვსაზღვროთ რამდენი ხნით ვქირაობთ ავტომობილს, რა თანხის დახარჯვა შეგვიძლია საწვავში და ავტომობილის დაქირავებაში.ქირაობის ფასები საკმაოდ განსხვავდება კლასისა და მოდელის მიხედვით, რაც უფრო ახალი და დიდი ზომის მანქანაა, მით მეტი დაგვიჯდება. დიდ მანქანას მეტი საწვავიც სჭირდება და შესაბამისად მეტი ბიუჯეტი.გირჩევ, დაახლოებით მაინც განსაზღვრო გადასახადებისა და დაზღვევის ხარჯებიც, რათა თავიდან აირიდო გაუთვალისწინებელი ფინანსური დანაკარგები და სტრესი.

არ დაგვავიწყდეს უსაფრთხოებაზე ზრუნვაც, მანქანის შერჩევისას ყურადღება მიაქციე რომ ავტომობილი აღჭურვილი იყოს ყველა აუცილებელი უსაფრთხოების სისტემით, როგორიცაა მძღოლის და მგზავრის ჰაერბალიშები, ABS, ESP და ა.შ. სასურველია მანქანას ჰქონდეს პირველადი დახმარების ნაკრები, სათადარიგო საბურავი და ცეცხლმაქრი.

გაითვალისწინე ისეთი ფუნქციებიც, როგორიცაა ნავიგაცია, Bluetooth კავშირი, უკანა გამაფრთხილებელი კამერა და სხვა.თუ მცირეწლოვნებიც გყავს ამ შემთხვევაში უსაფრთხოებისთვის დაგჭირდება სპეციალური სკამები, რაც როგორც წესი, გათვლილი აქვს ხოლმე გამქირავებელს და მოთხოვნის შემთხვევაში უკანა სავარძლებზე დაგახვედრებთ ბავშვისთვის განკუთვნილ სკამს.ასევე მნიშვნელოვანია ყურადღება მივაქციო მანქანის მდგომარეობას, დაზღვევას და გამქირავებლის რეპუტაციას.დაათვალიერე ავტომობილი გარეგნულად, ყურადღება მიაქციე საბურავების მდგომარეობას და ზოგადად იმ ფაქტორს თუ რამდენად მოვლილია ტრანსპორტი, რადგან მოვლილი მანქანა ნიშნავს, რომ გამქირავებელი ზრუნავს საკუთარ რეპუტაციასა და მომხმარებლის კომფორტზე.თუ შესაბამისი ცოდნა გაქვს, სავალი ნაწილების ზოგადი შემოწმებაც არ იქნებოდა ურიგო:ქირაობამდე გატესტე, როგორ მუშაობს საჭე და სამუხრუჭე სისტემები, შეამოწმე უსაფრთხოების ღვედები და შესაკრავები, მოიკითხე ძრავის მდგომარეობა, თუ ზამთარია ავტომობილი აღჭურვილი უნდა იყოს სეზონის შესაბამისი ბორბლებით.რაც შეეხება გამქირავებლის რეპუტაციას, ინფორმაციის მოძიებას სავარაუდოდ მარტივად შეძლებ, რადგან ბევრ ავტომობილების გაქირავების საიტზე არის კომენტარების ველი, სადაც მომხმარებლები ტოვებენ შეფასებებს, თუ რა მოეწონათ, ან არ მოეწონათ.კომენტარებში ხშირად იპოვი რჩევებს, თუ რა უნდა გაითვალისწინო ხელშეკრულების გაფორმებისას, როგორ უნდა შეამოწმო მანქანა, რა დამატებით მომსახურებებზე უნდა მიიღო ინფორმაცია და ა.შ. ეს დაგეხმარება მოემზადო ყველა შესაძლო სიტუაციისთვის და თავიდან აიცილო გაუგებრობები და პრობლემები.გარდა ამისა, კომენტარებიდან შეიძლება შეიტყო, თუ რომელი კომპანიები სარგებლობენ კარგი რეპუტაციით და რომლებთან თანამშრომლობა არ არის რეკომენდებული სხვადასხვა მიზეზის გამო.გაეცანი კომპანიის წესებსა და პირობებს. გაარკვიე, თუ რა სახის დაზღვევა მოჰყვება მანქანას და რას ფარავს იგი, რამდენად მოიცავს დაზღვევა მესამე მხარეებისთვის მიყენებულ ზარალს.თუ შემოთავაზებული დაზღვევა არ არის საკმარისი, შეიძლება დამატებითის შეძენაც.დეტალურად გაეცანი ხელშეკრულების პირობებს და გაარკვიე დამატებითი გადასახადებისა ან შეზღუდვების შესახებ, რასაც შესაძლოა ითვალისწინებდეს ხელშეკრულება.

თუ პროცესში რაიმეს ვერ გაიგებ ყველაფერი იკითხე, ხოლო თუ გამქირავებელი ამ კითხვებზე შენთვის გასაგებ პასუხებს ვერ მოგცემს, ან გრძელი, ჩახუჭუჭებული წინადადებებით დაგიწყებს საუბარს, გირჩევ არ დააიგნორო ეს ფაქტები და ან სხვა კომპანია ნახო, ვინც ადამიანურ ენაზე დაგაკვალაინებს, ან ყველა დეტალი სხვა, შენთვის სანდო პირთან ერთად გადაამოწმე.რომ შევაჯამოთ, მანქანის გაქირავება ხშირ შემთხვევაში მოხერხებული და კომფორტული გადაწყვეტილებაა, თუმცა თუ გსურს ავტომობილის ქირაობის პროცესი წინასწარ განსაზღვრული, კომფორტული, უსაფრთხო, ბიუჯეტური და შენს მიზნობირობაზე მორგებული იყოს, გაითვალისწინე მგზავრთა რაოდენობა, ბარგის მოცულობა, მოგზაურობის მიზანი, მარშრუტი და ბიუჯეტი.ავტომობილის დაქიავებამდე თან იქონიე ყველა საჭირო დოკუმენტი - მართვის მოწმობა, პირადობის მოწმობა ან პასპორტი, დეპოზიტის თანხა, დაზღვევისთვის საჭირო მონაცემები.გაითვალისწინე ასაკობრივი ზღვარი და კომპანიების მოთხოვნა მართვის გამოცდილებასთან დაკავშირებით.დეტალურად შეამოწმე უსაფრთხოების პარამეტრები, კარგად გაეცანი გამქირავებლის რეპუტაციასა და ქირავნობის ხელშეკრულებას.

NS