სააპელაციო სასამართლომ მკვლელობაში ბრალდებულის გამამართლებელი განაჩენი გამამტყუნებელი განაჩენით შეცვალა - რა დადგინდა 22 წლის ნიკა თუთაშვილის მკვლელობის საქმეზე
“ქუთაისის სააპელაციო სასამართლომ სრულად გაიზიარა პროკურატურის სააპელაციო საჩივარი, ლ.ს.-ს მიმართ გააუქმა ბათუმის საქალაქო სასამართლოს გამამართლებელი განაჩენი და მის ნაცვლად გამამტყუნებელი განაჩენი დაადგინა“, - ამის შესახებ განცხადებას პროკურატურა ავრცელებს.
- როგორც უწყების მიერ გავრცელებულ განცხადებაშია აღნიშნული: “სასამართლო პროცესზე გამოკვლეული მტკიცებულებებით დადასტურდა, რომ 2023 წლის 11 მარტს, ქალაქ ბათუმში, მემედ აბაშიძის ქუჩაზე, ლ.ს.-მ ურთიერთშელაპარაკების ნიადაგზე, დანის გამოყენებით, ნ.თ.-ს სხეულზე სიცოცხლისთვის სახიფათო დაზიანება მიაყენა. მიღებული დაზიანების შედეგად, დაზარალებული სამედიცინო დაწესებულებაში მიყვანიდან რამდენიმე საათში გარდაიცვალა.
ლ.ს.-ს ბრალდება საქართველოს სისხლის სამართლის კოდექსის 117-ე მუხლის მე-2 ნაწილით ჰქონდა წარდგენილი. ბათუმის საქალაქო სასამართლოს 2023 წლის 26 ოქტომბრის განაჩენით, ბრალდებული უდანაშაულოდ იქნა ცნობილი და გამართლდა.
ქუთაისის სააპელაციო სასამართლოს 2024 წლის 11 ივლისის განაჩენით, ლ.ს.-ს მიმართ გამოტანილი გამამართლებელი განაჩენი გაუქმდა, სასამართლომ იგი დამნაშავედ ცნო საქართველოს სისხლის სამართლის კოდექსის 117-ე მუხლის მე-2 ნაწილით (ჯანმრთელობის განზრახ მძიმე დაზიანება, რამაც გამოიწვია სიცოცხლის მოსპობა) და სასჯელის სახედ და ზომად 5 წლის ვადით თავისუფლების აღკვეთა განუსაზღვრა“,- აღნიშნულია პროკურატურის მიერ გავრცელებულ ინფორმაციაში.
- ცნობისთვის, მკვლელობა ბათუმში 2023 წლის 11 მარტს მოხდა. ახალგაზრდებს შორის კონფლიქტი ერთ-ერთ ბარში დაიწყო. ჩხუბის დროს დაიჭრა ნიკა თუთაშვილი, რომელიც კლინიკაში მიყვანის შემდეგ გარდაიცვალა.
მაშინ ბათუმის საქალაქო სასამართლოს გადაწყვეტილებით ნიკა თუთაშვილის მკვლელობაში ბრალდებული ლევან სირაბიძე პატიმრობიდან გათავისუფლდა. გადაწყვეტილება მოსამართლე კოტე ჭილაიამ მიიღო. მოსამართლის განაჩენით, სირაბიძე აუცილებელი მოგერიების ფარგლებში მოქმედებდა.
ასევე იხილეთ: