ასადის ოჯახის საიდუმლო გვირაბები, სავარაუდოდ, საიდანაც გაიქცნენ - რა აღმოაჩინეს მეამბოხეებმა მდიდრული სასახლის ქვეშ (ფოტო/ვიდეო)

უცხოური მედია ავრცელებს სირიელი მეამბოხეების მიერ გადაღებულ ვიდეო მასალას, რომელიც ასადის ოჯახის საიდუმლო გასაქცევი გვირაბების ქსელს აჩვენებს.

• ვიდეოში ჩანს, როგორ ეშვება სპირალური ფორმის თეთრი კიბე მაჰერ ალ-ასადის ე.წ. "სასახლის" იატაკიდან ქვევით. კადრები, სავარაუდოდ, მეამბოხის მიერაა გადაღებული და გვირაბების უზარმაზარ, ცარიელ სივრცეებს გვიჩვენებს, რომლებიც მაღალი, მრგვალი ჭერებით გამოირჩევა.

მაჰერ ალ-ასადი, სირიის გადაყენებული პრეზიდენტის ძმა და ელიტური მეოთხე დივიზიის ხელმძღვანელი, ცნობილია თავისი სისასტიკით. ვიდეოს აღწერაში ვკითხულობთ:

"გიგანტური გვირაბების კომპლექსი მაჰერ ასადის სასახლის ქვეშ, საკმარისია ფართო სატვირთო მანქანებისთვის, რომლებიც ოქროსა და კაპტაგონის (ნარკოტიკი, რომლის ზემოქმედების ქვეშ ტერორისტები სასტიკ ქმედებებს ჩადიან) ტვირთებს ატარებენ“.

სხვა წყაროს ცნობით, გვირაბებში დამონტაჟებული იყო ვენტილაცია და მოწყობილი იყო ოთახები, საძინებლები, მეტალის კარებითა და საკეტებით.

• დამასკოს დაცემა და ასადის გაქცევა

კვირას სირიელმა მეამბოხეებმა წინააღმდეგობის გარეშე დაიკავეს დედაქალაქი დამასკო, რამაც ბაშარ ალ-ასადს აიძულა ქვეყნიდან გაქცეულიყო, 13-წლიანი სამოქალაქო ომისა და მისი ოჯახის 60-წლიანი ავტოკრატიული მმართველობის შემდეგ.

გადაყენებული პრეზიდენტი და მისი ოჯახი რუსეთში გაიქცნენ და მოსკოვში თავშესაფარი მიიღეს. რუსული სახელმწიფო მედიის ინფორმაციით, ასადის ოჯახი უსაფრთხოდაა, თუმცა მაჰერ ასადის ადგილსამყოფელი კვლავ უცნობია.

• სირიელების დაბრუნების იმედი

გაეროს ლტოლვილთა უმაღლესი კომისრის ინფორმაციით, ასადის რეჟიმის დამხობის შემდეგ უკვე აღინიშნება სირიელების სამშობლოში დაბრუნების მცდელობები. ლიბანის საზღვარზე ასობით ადამიანი თავშესაფრის ძიებით შეიკრიბა.

ექსპერტები ფიქრობენ, რომ რეჟიმის დასრულება სირიაში სტაბილურობას გააძლიერებს და შესაძლოა, ათასობით ლტოლვილი კვლავ სამშობლოში დაბრუნდეს.

სამოქალაქო ომის დაწყებიდან (2011 წელი) ასადის რეჟიმს შვიდი მილიონი სირიელი გაექცა. მათი უმეტესობა მეზობელ ქვეყნებში, მათ შორის თურქეთსა და იორდანიაში, ლტოლვილთა ბანაკებში ცხოვრობს. მილიონზე მეტი ადამიანი ევროპაში დასახლდა, უმეტესად გერმანიაში.

• საერთაშორისო რეაქცია

აშშ-ის პრეზიდენტმა ჯო ბაიდენმა ასადის დამხობას მიესალმა, თუმცა აღიარა, რომ სირიაში მიმდინარე პროცესები რისკსა და გაურკვევლობას უკავშირდება.

ამავდროულად, CENTCOM-მა (აშშ-ის ცენტრალური სარდლობა) განაცხადა, რომ სირიის ცენტრალურ ნაწილში ისლამური სახელმწიფოს სამიზნეებზე ავიადარტყმები განახორციელეს.

• "ადამიანების სასაკლაო" - საიდნაიას ციხის შემზარავი რეალობა

ამავდროულად, მეამბოხეები ე.წ. წითელი ციხის პატიმრების გათავისუფლებას ცდილობენ. საიდნაიას ციხე, რომელსაც "ადამიანების სასაკლაოს" ეძახიან, განსაკუთრებით დაცული მიწისქვეშა საკნებით გამოირჩევა.

კადრებში ჩანს, როგორ ხსნიან მეამბოხეები საკნებს, ანგრევენ კედლებს და ასობით პატიმარს ათავისუფლებენ, მათ შორის ქალებსა და ბავშვებს. თუმცა, კაცები კვლავ რჩებიან ციხის მიწისქვეშა სექციებში.

Human Rights Watch-ის ინფორმაციით, 2011 წლიდან ციხეში 5,000-დან 13,000-მდე ადამიანი ჩამოახრჩვეს.

საზარელი ვიდეოში ჩანს პატარა ბავშვი, რომელიც ციხის საკნის გაღებული კარის მიღმა დაბნეული გამოიყურება, ხოლო მეამბოხეები ყვირიან „ალაჰ აკბარ“ – რაც ნიშნავს „ღმერთი უდიდესია,“ – ისინი ასობით პატიმარს ათავისუფლებენ.

• რუსეთის როლი და სამხედრო ბაზები

რუსეთმა სირიაში თავისი სამხედრო ბაზების უსაფრთხოების გარანტია მოითხოვა. ლატაკიის საჰაერო ბაზისა და ტარტუსის საზღვაო ობიექტის დაკარგვა რუსეთისთვის სერიოზული დარტყმა იქნება. რუსული ბლოგერი „რიბარი“ აცხადებს, რომ ბაზების გარშემო მდგომარეობა უკიდურესად დაძაბულია.

შეთანხმება, რომელიც უზრუნველყოფს რუსეთის საჰაერო ბაზას ლატაკიის პროვინციაში და საზღვაო ობიექტს ტარტუსში, მოსკოვისთვის დიდი შვება იქნება.

ტარტუსის დაკარგვა რუსეთისთვის სერიოზულ დარტყმას მიაყენებს, რაც შუა აღმოსავლეთში, ხმელთაშუა ზღვასა და აფრიკაში ძალაუფლების დემონსტრირებას მნიშვნელოვნად გაართულებს, აცხადებენ დასავლელი სამხედრო ანალიტიკოსები.

წყარო

წაიკითხეთ ასევე:

• "ბაშარ ალ-ასადი და მისი ოჯახი მოსკოვში არიან, რუსეთი არ ღალატობს მეგობრებს რთულ სიტუაციებში" - რა დეტალები ხდება ცნობილი