“ქალების მარში“, დასავლეთის უნივერსიტეტის კურსდამთავრებულები, სადაზღვევო ინდუსტრიის წარმომადგენლები, “ერთობის მარში“ და შვედეთის კურსდამთავრებულთა ქსელი პარლამენტთან გაერთიანდა - აქციის მონაწილეებმა რუსთაველის გამზირი გადაკეტეს (ფოტოები)
პარლამენტთან პროტესტი განახლდა, აქციის მონაწილეებმა რუსთაველის გამზირი გადაკეტეს. პარლამენტის მიმდებარე ტერიტორიაზე შეკრებილებს ცოტა ხნის წინ შეუერთდა “ქალების მარში”.
“ქალების მარში” პარლამენტთან ფილარმონიიდან ორბელიანების სასახლის გავლით მივიდა. ორბელიანების სასახლესთან მარშის მონაწილეებთან შესახვედრად საქართველოს პრეზიდენტი გამოვიდა და სიტყვით მიმართა.
ასევე, აქციას შეუერთდნენ კურსდამთავრებულებიც, რომლებმაც განათლება დასავლეთში მიიღეს. მოგვიანებით რუსთაველის გამზირამდე მსვლელობას გამართავს „ერთიანობის მარშიც“.
აქციას შეუერთდა მარში ლოზუნგით: “სადაზღვევო ინდუსტრია ევროპული მომავლისთვის”.
“სადაზღვევო ინდუსტრია ევროპული მომავლისთვის” - ამ ლოზუნგით სადაზღვევო კომპანიები რუსთაველის გამზირზე მიმდინარე აქციას შეუერთდნენ. მარში ვაკის პარკთან დაიწყო და რუსთაველის გამზირზე მსვლელობით მივიდნენ.
პროტესტის მონაწილეების მოთხოვნაა: ხელახალი არჩევნები და აქციების დროს დაკავებული მოქალაქეების პატიმრობიდან გათავისუფლება.
საკანონმდებლო ორგანოსთან ამ დროისთვის 5 სხვადასხვა მარშის მონაწილეები არიან შეკრებილები.
საპროტესტო აქცია უკვე 27-ე დღეა უწყვეტ რეჟიმში გრძელდება. დღის განმავლობაში თბილისის სხვადასხვა ლოკაციაზე საპროტესტო მსვლელობები იმართება, საღამოს 20:00 საათიდან კი შეკრების ადგილი პარლამენტის მიმდებარე ტერიტორიაა.
ცნობისთვის, მოქალაქეების პროტესტი პრემიერ-მინისტრის, ირაკლი კობახიძის 28 ნოემბრის განცხადებას მოჰყვა, რომლის მიხედვითაც საქართველომ ევროკავშირში გაწევრიანებაზე მოლაპარაკებების გახსნა 2028 წლამდე გადადო.
ფოტო: გიორგი ნიკოლიშვილი/IPN
იხილეთ ასევე: