თბილისში "ვერელებისა და ვაკელების მარში" მიმდინარეობს - ფოტოები დემონსტრაციიდან

• ფოტოგრაფი: გიორგი ჟამერაშვილი

ტარას შევჩენკოს ბაღში შეკრებილი აქციის მონაწილეები მსვლელობით პარლამენტის შენობისკენ გადაადგილდებიან.

მსვლელობა სლოგანით - "ვერელებისა და ვაკელების მარში" ამ წუთებში მელიქიშვილის გამზირზე იმყოფება.

მათ უჭირავთ მთავარი ბანერი წარწერით - "მოდის ვაკე და ვერა, ჩვენ გავიმარჯვებთ გვჯერა".

მათ ადგილზე საქართველოსა და ევროკავშირის დროშები აქვთ მოტანილი, ასევე, სხვადასხვა შინაარსის ბანერები - "განქოცდით ან შეგვეშვით", "ქოცალაქე მოქალაქეების ადგილი ვერა-ვაკე არ არის" და ა.შ.

მსვლელობაში მონაწილეობას ვაკეში მცხოვრები მოქალაქეების გარდა, სხვადასხვა პოლიტიკური პარტიისა და სამოქალაქო ორგანიზაციების წევრები და საზოგადოებისთვის ცნობილი სახეებიც იღებენ.

მსვლელობას ასევე, შსს-ს საპატრულო პოლიციის რამდენიმე ეკიპაჟიც მიჰყვება.

მოქალაქეების მოთხოვნები კვლავ უცვლელია - გათავისუფლდნენ მიმდინარე აქციების პერიოდში დაკავებული პირები და ჩაინიშნოს ხელახალი ვადამდელი არჩევნები.

• განახლება 21:02

პარლამენტის წინ შეკრებილმა აქციის მონაწილეებმა, რუსთაველის გამზირი გადაკეტეს. ცოტა ხნის წინ, აქციის მონაწილეებს "ვერელებისა და ვაკელების მარში შეუერთდა.

აქციის მონაწილეები ერთმანეთს ოვაციებით შეხვდნენ. ისინი სკანდირებენ - "საქართველოს გაუმარჯოს".