"ქალბატონი, რომელიც ჩემთან კითხვებით მოვიდა, თავიდანვე ძალიან უხეში იყო" - რა მოხდა თვითმფრინავში, რის გამოც ხაბიბ ნურმაგომედოვი რეისიდან მოხსნეს

UFC-ის ყოფილი ჩემპიონი მსუბუქ წონაში, ხაბიბ ნურმაგომედოვი აშშ-ში, თვითმფრინავიდან მოხსნეს და მას სხვა რეისით მოუწია გამგზავრება.

• ინციდენტი გასულ შაბათს Frontier Airlines-ის რეისზე მოხდა. ნურმაგომედოვი "ჰარი რეიდის" აეროპორტიდან ლას ვეგასში მიფრინავდა. ბორტგამცილებელს სურდა, რომ ხაბიბს შეეცვალა ადგილი, სხვაგან გადამჯდარიყო, რადგან საევაკუაციო გასასვლელთან იჯდა და ავიაკომპანიის წესების მიხედვით, იმ ადგილას დაჯდომა აკრძალული იყო.

გავრცელდა ვიდეოც, სადაც ჩანს, რომ ბორტგამცილებელს ეუბნება ხაბიბი, რომ თუ გადაუდებელი რამ მოხდება "მან იცის, როგორ დაეხმაროს ხალხს".

• "არ მოგცემთ უფლებას დაჯდეთ გასასვლელში. შეგიძლიათ დაიკავოთ სხვა ადგილი, ან მოგხსნით რეისიდან", - მიმართა ნურმაგომედოვს ბორტგამცილებელმა. ხაბიბმა ყოველგვარი კამათის გარეშე დატოვა თვითმფრინავი.

მოგვიანებით ნურმაგომედოვმა მომხდარი ინციდენტის შესახებ X-ის ოფიციალურ გვერდზე დაწერა.

"ქალბატონი, რომელიც ჩემთან კითხვებით მოვიდა, თავიდანვე ძალიან უხეში იყო. ის დაჟინებით მოითხოვდა ჩემს სხვა ადგილას გადაჯდომას. რა იყო ამის საფუძველი - რასობრივი, თუ ეროვნული საკითხი, არ ვიცი. ორი წუთში მან დაცვა გამოიძახა და ამ თვითმფრინავიდან გამომიშვეს, 1.5 საათის შემდეგ სხვა ავიაკომპანიის თვითმფრინავით წავედი დანიშნულების ადგილისკენ. როგორც ნახეთ, ყველაფერი გავაკეთე, რომ სიმშვიდე და პატივისცემა შემენარჩუნებინა, მაგრამ ეკიპაჟის ამ წევრებს შეუძლიათ უკეთესად მოექცნენ თავიანთ მომხმარებლებს", - წერს ხაბიბი.