ტრამპმა ტრანსგენდერ ქალებს სპორტში, ქალთა კატეგორიაში მონაწილეობა აუკრძალა - "ჩემი ადმინისტრაცია არ უყურებს, როგორ ურტყამენ კაცები სპორტსმენ ქალებს"

აშშ-ის პრეზიდენტმა დონალდ ტრამპმა ხელი მოაწერა აღმასრულებელ ბრძანებას, რომელიც ტრანსგენდერ ქალებს უკრძალავს ქალების კატეგორიაში, სპორტულ შეჯიბრებებში მონაწილეობას.

• ბრძანება ითვალისწინებს მითითებებს, რეგულაციებს და სამართლებრივ ინტერპრეტაციებს და ის დაავალდებულებს განათლების დეპარტამენტს გამოიძიონ რამდენად სრულდება ეს ბრძანება უმაღლეს სკოლებში და სხვადასხვა დაწესებულებებში.

რესპუბლიკელები აცხადებენ, რომ ეს აღადგენს სამართლიანობას სპორტში, მაგრამ ლგბტ თემის უფლებადამცველი ორგანიზაციები ამ ნაბიჯს დისკრიმინაციულად აფასებენ.

ბრძანება ძალაში შედის დაუყოვნებლივ.

• "თუ მამაკაცებს ნებას დართავთ, დაიპყრონ ქალთა სპორტული გუნდები შეიჭრან ქალების გასახდელებში, ეს საქმე გახდება გამოძიების საგანი“, - განმარტავს დონალდ ტრამპი.

თეთრ სახლში ამბობენ, რომ აშშ ყველაფერს გააკეთებს, რათა ტრანსგენდერი სპორტსმენები არ შეეჯიბრონ ქალებს საერთაშორისო ოლიმპიურ თამაშებზე, ან სხვა ისეთ საერთაშორისო შეჯიბრებებზე, რომლებიც ამერიკის შეერთებული შტატების მიწაზე ჩატარდება.

დონალდ ტრამპის მიერ ხელმოწერილი აღმასრულებელი ბრძანება ეხება 2028 წლის ოლიმპიურ თამაშებსაც, რომელიც ლოს ანჯელესში გაიმართება.

ტრამპი განმარტავს, რომ უარს ეტყვის ვიზაზე ტრანსგენდერ ოლიმპიურ სპორტსმენებს და ისინი ვერ შეძლებენ აშშ-ში ოლიმპიურ თამაშებში მონაწილეობას.

• "ომი ქალთა სპორტთან დაკავშირებით დასრულებულია. ჩემი ადმინისტრაცია არ დადგება განზე და არ უყურებს, როგორ სცემენ და ურტყამენ კაცები სპორტსმენ ქალებს", - განაცხადა დონალდ ტრამპმა.

მან მოუწოდა აშშ-ის უსაფრთხოების მდივანს, უარყოს ნებისმიერი სავიზო განაცხადი, რომელსაც შეიტანენ ტრანსგენდერები.

თეთრ სახლში მიიჩნევენ, რომ ეს პოლიტიკა გადამწყვეტი მნიშვნელობისაა სპორტში სამართლიანობის აღსადგენად, ისევე როგორც უსაფრთხოებისთვის.