"24 წელია აქ ვცხოვრობ და მსგავსი არაფერი მინახავს" - დიდ ბრიტანეთში მიწის ჩავარდნის შემთხვევებმა იმატა: რა არის მიზეზი?
გუშინ, გოდსტოუნში რამდენიმე შენობის ევაკუაცია განხორციელდა - მიზეზი ქუჩაში მიწის ჩავარდნა გახდა.
"ჩვენ ვმუშაობთ სასწრაფო დახმარების სამსახურებთან და კომუნალურ კომპანიებთან, ასევე ავტომაგისტრალებთან და ტანდრიჯის რაიონის საბჭოსთან ერთად, რათა საზოგადოება საფრთხისგან დავიცვათ.
გამოძიება გრძელდება ტერიტორიის უსაფრთხოებისა და კომუნალური საშუალებების შეკეთების მიზნით. მოსახლეობას მოვუწოდებთ, მიმდებარე ტერიტორიას არ მიუახლოვდნენ. ყველაფერი კეთდება სიტუაციის სწრაფად და უსაფრთხოდ მოსაგვარებლად", - განაცხადა კარლ ბუსიმ, სურეის ოლქის საბჭოს დირექტორის ასისტენტმა.
გამოქვეყნებულ განცხადებაში, SES Water-მა თქვა, რომ ღამის სამუშაოები RH9-ის ტერიტორიაზე წყლის მიწოდების აღდგენის მიზნით წარმატებით დასრულდა.
- ადგილობრივების განცხადებით, ამ ადგილას ადრე ქვიშის კარიერი იყო, მათივე თქმით, მიწის ქვეშ გამოქვაბულებია, სწორედ ეს გახდა ჩავარდნის მიზეზი.
"24 წელია აქ ვცხოვრობ და მსგავსი არაფერი მინახავს. ჯერ კიდევ შოკში ვარ. ვფიქრობ ეს სატვირთო მანქანების რაოდენობასთან უნდა იყოს კავშირში" - ამბობს 94 წლის გრეჰემ ბრუკსი.
"ბრიტანეთში მსგავსი შემთხვევების ბოლოდროინდელი ზრდა მკაფიო შეხსენებაა იმისა, თუ რამდენად დაუცველია ჩვენი ურბანული გარემო ბუნების ძალების მიმართ. ექსტრემალური ამინდი მზარდ ზეწოლას ახდენს სადრენაჟე სისტემებზე, რომელთაგან ბევრი ვიქტორიანულ ეპოქაში აშენდა. თუ ჭარბი წვიმის წყალი სათანადოდ არ იმართება, ის მიწაში გროვდება და ნიადაგის დესტაბილიზაციას იწვევს" - ამბობს მარტინ ლამბლი, Wavin-ის Urban Climate Resilience-ის გლობალური პროდუქტის მენეჯერი.