ეგზიტპოლების თანახმად, გერმანიაში საპარლამენტო არჩევნებში ფრიდრიხ მერცის “ქრისტიან-დემოკრატიული კავშირი“ ლიდერობს

ეგზიტპოლების თანახმად, გერმანიაში ვადამდელ საპარლამენტო არჩევნებში ფრიდრიხ მერცის კონსერვატიული „ქრისტიან-დემოკრატიული კავშირი“ (CDU) ლიდერობს, მეორე ადგილზე გავიდა ულტრამემარჯვენე პარტია „ალტერნატივა გერმანიისთვის“, ხოლო ოლაფ შოლცის „გერმანიის სოციალ-დემოკრატიული“ პარტია მესამე ადგილზეა.

გერმანიის ვადამდელ საპარლამენტო არჩევნებში ქრისტიან-დემოკრატიული კავშირი ლიდერობს 29%-ით, ხოლო პარტიამ ალტერნატივა გერმანიისთვის - 19,5% მიიღო.

ეგზიტპოლის თანახმად, შედეგები ასე ნაწილდება:

1. ქრისტიან დემოკრატები (CDU-CSU) - 29%

2. ალტერნატივა გერმანიისთვის (AFD) - 19,5%

3. სოციალ-დემოკრატიული პარტია (SPD) - 16%

4. მწვანეები - 13.5%

5. მემარცხენეები - 8.5%

ცნობილია კიდევ ერთი ეგზიტპოლის შედეგები:

„ქრისტიან-დემოკრატიული კავშირი“ (CDU) - 28.5%;

ულტრამემარჯვენე „ალტერნატივა გერმანიისთვის“ (AFD) - 20%;

„გერმანიის სოციალ-დემოკრატიული“ პარტია (SPD) - 16.5%;

„მწვანეები“ - 12%;

„Die Linke“ - 9%;

FDP - 5%;

BSW - 5%;

შეგახსენებთ, გერმანიაში საპარლამენტო არჩევნები მას შემდეგ დაინიშნა, რაც გასული წლის ნოემბერში ოლაფ შოლცის 3-პარტიანი მმართველი კოალიცია დაიშალა.

არჩევნებში მთავარი კანდიდატები იყვნენ მოქმედი კანცლერი ოლაფ შოლცი სოციალ-დემოკრატიული პარტიიდან და ფრიდრიხ მერცი ქრისტიან-დემოკრატიული კავშირიდან.

რაც შეეხება ეგზიტპოლის მიხედვით მეორე ადგილზე გასულ ულტრამემარჯვენე პარტიას ალტერნატივა გერმანიისთვის, მათ 2025 წლის საპარლამენტო არჩევნებში უმაღლესი შედეგი მიიღეს - პარტიის მხარდაჭერის მაჩვენებელი 2021 წლის არჩევნებთან შედარებით თითქმის გაორმაგებულია.

გერმანიის ბუნდესტაგმა 16 დეკემბერს უნდობლობა გამოუცხადა კანცლერ ოლაფ შოლცის მთავრობას, რის შემდეგაც ქვეყნის პრეზიდენტმა, ფრანკ-ვალტერ შტაინმაიერმა, პარლამენტის დათხოვნის გადაწყვეტილება მიიღო.

მთავრობაში კრიზისი 6 ნოემბერს დაიწყო, როდესაც კანცლერმა შოლცმა ფინანსთა მინისტრი, "თავისუფალი დემოკრატების" ლიდერი ქრისტიან ლინდნერი, თანამდებობიდან გადააყენა. ამის შემდეგ მმართველი კოალიცია, რომელიც "სოციალ-დემოკრატიული პარტიისგან" (SPD), "მწვანეებისა" (GRÜNE) და "თავისუფალი დემოკრატებისგან" (FDP) შედგებოდა, ოფიციალურად დაიშალა.