სუპერმარკეტში ჩაკეტილი ხალხი, ტალახით სავსე ქუჩები და პანიკა დამსვენებლებში - რა ხდება კანარის კუნძულებზე ძლიერი წვიმის შემდეგ (ფოტოები)
კანარის კუნძულებზე ძლიერმა წვიმამ წყალდიდობა გამოიწვია. ადგილობრივი მედიის ცნობით, სულ მცირე 80 ადამიანი სუპერმარკეტში ჩაიკეტა, რადგან მაღალმა წყალმა ავტოსადგომზე წვდომა შეზღუდა.
- ხელისუფლება ადგილობრივებს და დამსვენებლებს მოუწოდებს, თავი აარიდონ მგზავრობას ან პარკირებას ხევებთან ახლოს, რადგან რეგიონში უფრო ძლიერი წვიმაა მოსალოდნელი.
ქარიშხლის შედეგად შექმნილი სახიფათო პირობების გამო, მრავალი პლაჟი დაიხურა, მათ შორის: La Garita, Hoya del Pozo, Playa del Hombre, El Barranquillo, Melenara, Salinetas და Ojos de Garza.
გარსია რუისის გზის მაცხოვრებლები შუა ღამემდე ვერ ახერხებდნენ ტერიტორიაზე შესვლას. სასწრაფო დახმარების სამსახურმა დაადასტურა, რომ მსხვერპლი არ ყოფილა. წყალდიდობისა და მეწყრის გამო რამდენიმე სანაპირო ზონა და გზა მიუწვდომელია.
მუნიციპალური მუშაკები, უსაფრთხოების ძალებთან თანამშრომლობით, აქტიურად მუშაობენ დაზარალებული ტერიტორიების აღსადგენად.
ყველაზე ინტენსიური ნალექი მოვიდა ლა პალმას აღმოსავლეთ და ჩრდილოეთ რაიონებში, სამხრეთ-აღმოსავლეთ ტენერიფესა და ჩრდილო-აღმოსავლეთ გრან-კანარიაში. სახელმწიფო მეტეოროლოგიური სააგენტოს (Aemet) ინფორმაციით, კანარის კუნძულებზე უამინდობა 4 მარტამდე შენარჩუნდება. დასავლეთ კუნძულების ჩრდილოეთ და ჩრდილო-დასავლეთ ფერდობებზე წვიმა მოსალოდნელია მთელი დღის განმავლობაში.
გასულ წელს წყალდიდობას ვალენსიაში და ესპანეთის სხვა ნაწილებში 200-ზე მეტი ადამიანი ემსხვერპლა, ათასობით სახლი დაინგრა, რამაც რეგიონული ხელისუფლების წინააღმდეგ მასობრივი პროტესტი გამოიწვია.