ის, უბრალოდ, ადგა და საკუთარი სკამით წავიდა - ჯასტინ ტრუდოსთვის წლების წინ ნაწინასწარმეტყველები პრემიერობის დასასრული

53 წლის ჯასტინ ტრუდოს, როგორც კანადის პრემიერ-მინისტრის კარიერა, დასრულდა. ტრუდომ კანადის პარლამენტის თემთა პალატა ჩვეული ეპატაჟურობით დატოვა - ისე, როგორც მის პერსონას შეეფერებოდა.

• ის უბრალოდ ადგა და დარბაზიდან საკუთარი სკამით წავიდა.

დიახ, ჯასტინ ტრუდომ კანადის თემთა პალატის სხდომის დასრულების შემდეგ, დარბაზიდან მისი სკამი წაიღო. კანადელ დეპუტატებს უფლება აქვთ თავიანთი სკამები გაიტანონ, მაგრამ მისი ღირებულება უნდა გადაიხადონ....

ტრუდომ კანადის პრემიერის სავარძელი 2015 წელს დაიკავა და მსოფლიოს წინაშე გამოჩნდა, როგორც სრულიად განსხვავებული ლიდერი.

როდესაც ჯასტინ ტრუდო სულ რაღაც ოთხი თვის იყო, აშშ-ის იმჟამინდელმა პრეზიდენტმა რიჩარდ ნიქსონმა იწინასწარმეტყველა, რომ ჩვილი ერთ დღესაც მამის, კანადის ყოფილი პრემიერ-მინისტრის, პიერ ტრუდოს კვალს გაჰყვებოდა.

• 1972 წელს ოტავაში სახელმწიფო ვიზიტის დროს ნიქსონმა თავის კანადელ კოლეგას მიმართა: "მსურს ვადღეგრძელო კანადის მომავალი პრემიერ-მინისტრი, ჯასტინ პიერ ტრუდო", - თქვა ნიქსონმა.

ტრუდომ პოლიტიკური კარიერა მამის გარდაცვალების შემდეგ დაიწყო. 2008 წელს გახდა დეპუტატი. ჯერ კიდევ ადრეულ ეტაპზე ის განიხილებოდა ლიბერალური პარტიის ლიდერად.

2011 წელს კვლავ დეპუტატად აირჩიეს. მას შემდეგ რამდენჯერმე თქვა უარი ლიბერალური პარტიის ხელმძღვანელობაზე.

2012 წელს კი კენჭისყრის სურვილი გამოთქვა. კამპანიის დროს ოპონენტები აკრიტიკებდნენ გამოუცდელობის გამო, ამბობდნენ, რომ სხვადასხვა საკითხზე მას საკუთარი პოზიცია არ გააჩნდა.

"გამარჯვება ვის აღელვებს? მთავარია ხალხს ვემსახუროთ", - ასე პასუხობდა კრიტიკას ტრუდო.

ტრუდო, რომელიც ხელისუფლებაში 2015 წელს მოვიდა, საზოგადოებას "რეალურ ცვლილებებს" და პროგრესს ჰპირდებოდა. საინტერესოა, როგორ ახასიათებდა ჯასტინი საკუთარ თავს:

• "მე მასწავლებელი ვარ. ასე განვსაზღვრავ ჩემს თავს. კარგი მასწავლებელი არ არის ის, ვინც პირდაპირ პასუხებს აძლევს ბავშვებს, არამედ კარგი მასწავლებელია ის, ვისაც ესმის ბავშვის საჭიროებების და გამოწვევების და აძლევს შესაბამის ინსტრუმენტს, მათთან გასამკლავებლად. სწორედ ეს ეხმარება ადამიანებს წარმატების მიღწევაში. რას გავაკეთებ საბოლოოდ, პოლიტიკის შემდეგ? ისეთ რამეს, რაც სწავლებასთან იქნება დაკავშირებული", - ამბობდა ტრუდო

კანადელი ექსპერტების კვლევითა და შეფასებით, პირველი ვადის დროს ჯასტინმა დაპირებების 92% შეასრულა.

• და რა თქმა უნდა, ჯასტინ ტრუდოს წინდები

ეს ის თემაა, რომელიც პირველ რიგში ახსენდებათ ხოლმე კანადელ პოლიტიკოსზე საუბრისას.

სხვადასხვა პრინტისა და ფერების წინდებს ჯანსტინ ტრუდო პოლიტიკური განაცხადებისთვის იყენებდა.

ერთ-ერთი წინდა კი სკანდალის მიზეზი გახდა, რადგან მიიჩნიეს, რომ ის რასისტულ ნიშნებს შეიცავდა.

დღეს, როდესაც ტრუდოზე ლაპარაკობენ, გარდა მისი შეცდომებისა, თუ სწორი პოლიტიკური ნაბიჯებისა, ყოველთვის აღნიშნავდნენ ტრუდოს ცხოვრების წესს და ექსპერტთა შეფასებით, პოლიტიკა არ იყო ის, რამაც ტრუდოს ცხოვრება წაართვა, როგორც ეს ხდება ხოლმე უმეტეს შემთხვევაში და მის ცხოვრებას შეიძლება ეწოდოს "ცხოვრება პოლიტიკაში".

• რაც შეეხება კანადის მომავალ პრემიერ-მინისტრს, აღნიშნულ პოსტზე ტრუდოს გაერთიანებული სამეფოსა და კანადის ცენტრალური ბანკის ყოფილი ხელმძღვანელი, მარკ კარნი შეცვლის.

მან "ლიბერალური პარტიის“ ლიდერის არჩევნებში გაიმარჯვა, რაც იმას ნიშნავს, რომ ქვეყნის პრემიერ-მინისტრი გახდება.

პარტიის ლიდერის არჩევნებში სულ ოთხი კანდიდატი მონაწილეობდა და მარკ კარნიმ 131 674 ხმა, ანუ ხმების 85.9%-ი მიიღო.