"ტელეფონზე რამდენჯერმე დაურეკა, აგინა, დაემუქრა... მთელი დღე სახლთან ელოდა" - ადვოკატის თქმით, ვასო ფხაკაძეზე ზეწოლის მცდელობაზე საჩივარი პროკურატურაში შეიტანეს

ადვოკატი თორნიკე მიგინეიშვილი ავრცელებს ინფორმაციას, რომ მსახიობებსა და ტელეკომპანია “პირველის” თანამშრომლებზე მუქარისა და დაშინების ფაქტები გრძელდება.

ამჟამად ადვოკატის ცნობით, იუმორისტ ვასო ფხაკაძეზე იყო ზეწოლის მცდელობა.

“გრძელდება მუქარა და დაშინება მსახიობებსა და ტელეკომპანია "პირველის" თანამშრომლებზე.

ვიცავ ვასო ფხაკაძის ინტერესებს.

ვ.ფხაკაძეს 12 მარტს, დღისით, სახლში მიადგა პოლიციის ყოფილი თანამშრომელი, მაგრამ ვასო სახლში არ დახვდა. ოჯახის წევრს ნომერი მოტყუებით გამოართვეს.

შემდგომ იმავე მამაკაცმა ტელეფონზე რამდენჯერმე დაურეკა, აგინა, დაემუქრა, მოგონილი მიზეზები გაუჟღერა და მთელი დღე სახლთან ელოდა.

ეს პირი იდენტიფიცირებულია.

ამ წუთებში საჩივარი შეგვაქვს თბილისის პროკურატურაში და ველოდებით გამოძიების დაწყებას”,- წერს მიგინეიშვილი სოციალურ ქსელში.