"შემზარავი მომენტი იყო" - American Airlines-ის რეისის მგზავრები ჰყვებიან, როგორ გამოიყვანეს ცეცხლწაკიდებული თვითმფრინავიდან
American Airlines-ის რეისი 1006 დენვერის აეროპორტში ავარიულად დაეშვა. დაშვების შემდეგ აეროპორტის ასაფრენ ბილიკზე მოძრაობისას თვითმფრინავს ცეცხლი გაუჩნდა. ბორტზე 178 მგზავრი იმყოფებოდა - მათი ევაკუაცია თვითმფრინავის ფრთიდან მოხდა. სერიოზული დაზიანებების შესახებ ინფორმაცია არ გავრცელებულა. აეროპორტის ოფიციალური პირების თქმით, 12 მგზავრი მცირე დაზიანებებით, საავადმყოფოში მკურნალობს.
- American Airlines-ის რეისი 1006 კოლორადოს სპრინგსის აეროპორტიდან აფრინდა და დალას-ფორტ უორტის საერთაშორისო აეროპორტისკენ მიემართებოდა, როდესაც "ეკიპაჟმა ძრავის ვიბრაციის შესახებ შეტყობინება გაგზავნა".
"შემზარავი მომენტი იყო", - ასე აღწერა ერთ-ერთმა მგზავრმა American Airlines-ის რეისიდან ჩამოსვლის გამოცდილება.
”იმედი მქონდა, რომ ყველაფერი კარგად იქნებოდა, მაგრამ დანამდვილებით არაფერი ვიცოდით. ეს ძალიან გრძელი 10 წუთი იყო. ვკანკალებდი... მადლიერი ვარ, რომ ყველა გადარჩა", - ამბობს ინგრიდ ჰიბიტი.
FAA და ტრანსპორტის უსაფრთხოების ეროვნული საბჭო ინციდენტს იძიებს.
"გამომძიებლები დაიწყებენ თვითმფრინავის გამოკვლევის პროცესს, მოწმეთა და ეკიპაჟის გამოკითხვას და იმ მონაცემების მოპოვებას, რომლებიც გამოძიებისთვის საჭირო ინფორმაციას შეიცავს. წინასწარი ანგარიში ხელმისაწვდომი იქნება 30 დღის განმავლობაში; მასზე წვდომა შესაძლებელია ჩვენი გამოძიების მონაცემთა ბაზაში
წინასწარი დასკვნა შეიცავს გამოძიების საწყის ეტაპზე მოპოვებულ ფაქტობრივ ინფორმაციას. მოვლენის სავარაუდო მიზეზი, ნებისმიერ ხელშემწყობ ფაქტორთან ერთად, დეტალურად იქნება აღწერილი საბოლოო ანგარიშში, რომელიც მზად იქნება 12-24 თვეში“, - ნათქვამია NTSB-ის განცხადებაში.