"ქალს სახეში იარაღი დაუმიზნა და უთხრა - შენ გააკეთებ იმას, რასაც მე გეტყვი" - ენდრიუ ტეიტის საქმეში ახალი სკანდალური დეტალები ხდება ცნობილი
სასამართლოს დოკუმენტების მიხედვით, ცნობილმა ინფლუენსერმა ენდრიუ ტეიტმა, ქალს სახეში იარაღი დაუმიზნა და უთხრა - "შენ გააკეთებ იმას, რასაც მე გეტყვი, თორემ ცუდად წაგივა საქმე".
ინფორმაციას BBC აქვეყნებს.
-
გამოცემის ცნობით, ერთი ქალი ამტკიცებს, რომ ტეიტი მას მოკვლით დაემუქრა, მეორე კი ამბობს, რომ ინფლუენსერმა ნათლად განუცხადა, რომ მოკლავდა ნებისმიერს, ვისაც ის გამოელაპარაკებოდა, კიდევ ერთი ქალის თქმით, ტეიტმა დაარწმუნა, რომ მას ადამიანები ჰყავს მოკლული.
ტეიტმა უზენაეს სასამართლოში წარდგენილ წერილობით თავდაცვაში ეს ბრალდებები უარყო, მათ "ტყუილების კონა" და "გულისამრევი გამონაგონი" უწოდა.
ინფლუენსერის წინააღმდეგ ჯერ კიდევ მიმდინარეობს სასამართლო დავა სამ ქვეყანაში - რუმინეთში, აშშ-სა და გაერთიანებულ სამეფოში.
რაც შეეხება ზემოთ აღნიშნულ სავარაუდო დანაშაულებს, რომლის შესახებ ინფორმაცია ახლახან გამოაქვეყნა BBC-მ, ლუტონსა და ჰიჩინში, 2012-დან 2015 წლამდე პერიოდში მოხდა.
მომჩივანი ოთხი ქალიდან ორი 2015 წელს ტეიტის ვებ-კამერების კომპანიაში მუშაობდა, ხოლო დანარჩენი ორი, 2013 და 2014 წლებში, მასთან ურთიერთობაში იყო.
BBC-ის მიერ ნანახ დოკუმენტებში წარმოდგენილი ზოგიერთი ბრალდების თანახმად, ტეიტმა:
- გააუპატიურა და ახრჩობდა ქალს, რომელიც მისი ვებ-კამერების კომპანიაში მუშაობდა 2015 წელს;
- თავს დაესხა მეორე ქალს, რომელიც ასევე მუშაობდა მისი ვებ-კამერების კომპანიაში იმავე პერიოდში.
- ზემოაღნიშნულ ორივე ქალს იმდენად ხშირად უჭერდა ყელზე, რომ მათ თვალებში წითელი ჩაქცევები განუვითარდათ.
- ერთ ქალს უთხრა - "ახლა ვფიქრობ, გაგაუპატიურო თუ არა".
- სექსის დროს ახრჩობდა მეოთხე მოსარჩელეს, სანამ ქალმა გონება არ დაკარგა, შემდეგ კი მასთან სექსი გააგრძელა.
ცნობისთვის უკვე ორ წელზე მეტია, რაც ენდრიუ და ტრისტან ტეიტების წინააღმდეგ რუმინეთში გამოძიება მიმდინარეობს და ის ამ დრომდე არ არის დასრულებული. ბრალდებები 2012-2015 წლამდე პერიოდში ჩადენილ სავარაუდო დანაშაულებს ეხება. იძიებენ სავარაუდო გაუპატიურების, ადამიანებით ვაჭრობისა და კრიმინალური დაჯგუფების შექმნის საქმეებს. ტეიტებს რუმინეთის დატოვება ეკრძალებოდათ. მათ გარკვეული პერიოდის განმავლობაში შინაპატიმრობაც ჰქონდათ მისჯილი.
რუმინეთის საგარეო საქმეთა მინისტრმა მედიასთან განაცხადა, რომ მიუნხენის უსაფრთხოების კონფერენციაზე ტრამპის წარმომადგენელთან, რიჩარდ გრენელთან მან ენდრიუ და ტრისტან ტეიტების საკითხი განიხილა. მინისტრის თქმით, "საუბრისას აშკარა იყო გრენელის მხარდაჭერა ძმების მიმართ". ამ განცხადებიდან მალევე კი ძმებმა, რომლებსაც რუმინეთის დატოვება ეკრძალებოდათ, ქვეყანა დატოვეს.