ხელოვნური ინტელექტი პოტენციურ მკვლელებს გამოავლენს - დიდ ბრიტანეთში ახალ პროექტზე მუშაობენ, რომელმაც კრიტიკა გამოიწვია

Guardian-ის ინფორმაციით, დიდი ბრიტანეთის იუსტიციის სამინისტრო მუშაობს ახალ პროგრამაზე, რომელიც ხელოვნური ინტელექტის საშუალებით „მკვლელების იდენტიფიცირებას“ მოახდენს.

პროექტის ფარგლებში, ხელოვნური ინტელექტის ალგორითმები გამოავლენენ პოტენციურ მკვლელებს უკვე მსჯავრდებულ კრიმინალებს შორის. სავარაუდოდ, მკვლევარები გამოიყენებენ ალგორითმებს ათასობით ადამიანის, მათ შორის მსხვერპლების შესახებ ინფორმაციის გასაანალიზებლად, რათა გამოავლინონ ძალადობრივი დანაშაულის ჩამდენი პირები.

• სქემას თავდაპირველად “ჰომიციდის პროგნოზირების პროექტი" ეწოდა, მაგრამ სახელი შეიცვალა და ახლა მოიხსენიება როგორც "მონაცემთა გაზიარება რისკის შეფასების გასაუმჯობესებლად".

იუსტიციის დეპარტამენტი იმედოვნებს, რომ გეგმა გააუმჯობესებს საზოგადოებრივ უსაფრთხოებას, თუმცა აქტივისტებმა მას საშინელი და დისტოპიური უწოდეს.

• პროექტის დეტალების მოპოვება ბრიტანულმა სამოქალაქო თავისუფლებების არაკომერციულმა Statewatch-მა შეძლო . პროექტი ყოფილი პრემიერ-მინისტრის რიში სუნაკის ოფისის დაკვეთით განხორციელდა.

ალგორითმები ოფიციალური წყაროების გამოყენებით გააანალიზებენ 2015 წლამდე ჩადენილი დანაშაულების მონაცემებს, მათ შორის პრობაციის სამსახურისა და მანჩესტერის პოლიციის მონაცემებს. ოფიციალური ინფორმაციით, გამოყენებული იქნება იმ პირთა პერსონალური მონაცემები, რომლებიც ერთხელ მაინც არიან ნასამართლევი.

• თუმცა, Statewatch ამტკიცებს, რომ მონაცემები მოიცავს ინფორმაციას იმ ადამიანების შესახებ, რომლებიც არასოდეს ყოფილან ნასამართლევი, თუმცა ოჯახური ძალადობის მსხვერპლნი იყვნენ.

დამუშავებული ინფორმაცია მოიცავს სახელებს, დაბადების თარიღებს, სქესს, ეთნიკურობას და ხალხის ეროვნული პოლიციის საიდენტიფიკაციო ნომრებს.

თავის მხრივ, დიდი ბრიტანეთის იუსტიციის სამინისტრო ამბობს, რომ პროექტი წმინდა კვლევით ხასიათს ატარებს. იუსტიციის დეპარტამენტის წარმომადგენლის თქმით, პროექტი ხელს შეუწყობს პრობაციის მსჯავრდებულთა შორის დანაშაულის რისკის უკეთ გააზრებას.

წყარო