ილონ მასკი აშშ-ში ახალ ქალაქს აფუძნებს - რა ხდება ცნობილი "Starbase"-ის შესახებ, სადაც ერთ-ერთ ქუჩაზე მილიარდერის ბიუსტი დგას
ტეხასის სამხრეთ ნაწილში მდებარე ტერიტორია, სადაც ილონ მასკის SpaceX კომპანია ოპერირებს, ოფიციალურად ქალაქი გახდება და მას Starbase ერქმევა.
მაცხოვრებლებმა შაბათს ჩატარებულ არჩევნებში მიწის ნაკვეთის ახალ მუნიციპალიტეტად გამოსაცხადებლად საკუთარი თანხმობა დააფიქსირეს. უფლების მქონე 283 ამომრჩევლიდან უმეტესობა SpaceX-ის თანამშრომელია. ოფიციალური მონაცემებით, არჩევნებში Starbase-ის ქალაქად აღიარების 212 მომხრე იყო, 6 კი - წინააღმდეგი.
ილონ მასკმა არჩევნების შედეგები თავისივე კუთვნილ სოციალურ პლატფორმა X-ზე აღნიშნა და დაწერა: "სტარბეისი ახლა ნამდვილი ქალაქია!"
ახალი ქალაქი დაახლოებით 3.9 კვადრატულ კილომეტრზეა გადაჭიმული. ქალაქის მთავრობა შედგება მერისა და ორი კომისრისგან, რომლებიც დაგეგმვას, გადასახადებს და სხვა ადგილობრივ საკითხებს ერთად გაუძღვებიან.
- ქალაქის პირველ მერად ბობი პედენი, SpaceX-ის ვიცე პრეზიდენტი დასახელდა, რომელმაც უკონკურენტოდ იყარა კენჭი. ამავე გზით დაინიშნნენ კომისრებიც.
“სტარბეისის“ ქალაქად აღიარებას ყველა სიხარულით არ შეხვედრია. ქალაქის მიმდებარე ტერიტორიაზე მცხოვრები ზოგიერთი ადამიანი მასკის იდეას ეწინააღმდეგება და კომპანიას ადგილობრივი გარემოსთვის ზიანის მიყენებაში ადანაშაულებს. მას შემდეგ, რაც SpaceX-მა ამ ტერიტორიაზე მიწის შესყიდვა დაიწყო, კომპანიის საცხოვრებელი სახლები და SpaceX-ის ობიექტები, მასკის რეზიდენციასთან ერთად, ეტაპობრივად აშენდა.
მასკის ჩართულობაზე მიუთითებს ქალაქის ერთ-ერთი ქუჩა, რომელიც Memes Street-ადაა წოდებული და უშველებელი ბიუსტი, რომელიც თავად მაგნატს გამოსახავს. გავრცელებული ინფორმაციით, ბიუსტი ცოტა ხნის წინ ვანდალიზმის შედეგად დაზიანდა კიდეც.
- “სტარბეისის“ ქალაქის შემოგარენში დაახლოებით 500 ადამიანი ცხოვრობს.
გარემოსდაცვითი ჯგუფებიც აკრიტიკებენ SpaceX-ის გავლენას მიმდებარე ველურ ბუნებაზე, მას სინათლით დაბინძურებასა და რაკეტების გაშვებით მიღებული ნარჩენებით მიმდებარე ტერიტორიის დანაგვიანებაში ადანაშაულებენ. 2024 წელს კომპანია დაბინძურებისთვის აშშ-ის გარემოს დაცვის სააგენტოს მიერ 150 000 დოლარით დაჯარიმდა კიდეც.
წყარო:bbc
მოამზადა: ანა სიბოშვილმა