ქაოსი გერმანიის პარლამენტში: ფრიდრიხ მერცი კანცლერად ვერ აირჩიეს, "ალტერნატივა გერმანიისთვის" ვადამდელი არჩევნების ჩატარებას ითხოვს - ბოლო ცნობები

გერმანიის პარლამენტმა ხმის მიცემის პირველ ტურში ფრიდრიხ მერცი კანცლერად ვერ აირჩია, - ამის შესახებ ინფორმაციას სააგენტო Reuters-ი ავრცელებს.

• "ქრისტიან-დემოკრატიული კავშირის" ლიდერის, ფრიდრიხ მერცის კანდიდატურას გერმანიის პარლამენტის ქვედა პალატაში მხარი 310-მა დეპუტატმა დაუჭირა, მის წინააღმდეგ ხმა კი 307-მა მისცა.

ფრიდრიხ მერცს ბუნდესტაგის წევრების უმრავლესობის, 316 დეპუტატის ხმა სჭირდებოდა.

ბუნდესტაგის ქვედა პალატას ქვეყნის კანცლერის ასარჩევად 14 დღე აქვს და ახლა მას უბრალო უმრავლესობა აირჩევს. კენჭისყრის მეორე ტური, შესაძლოა დღესვე ჩატარდეს.

• პარტია „ალტერნატივა გერმანიისთვის“ ლიდერის, ალის ვაიდელის განცხადებით, გერმანიის პარლამენტის მიერ კენჭისყრის პირველი ტურის შედეგად ფრიდრიხ მერცის კანცლერად არჩევის წარუმატებელი მცდელობა „გერმანიისთვის კარგ დღეს“ წარმოადგენს.

"თაღლითი და მატყუარა ფრიდრიხ მერცი არჩევნების პირველ ტურში დამარცხდა. ეს მომავალი მთავრობის არასტაბილურობის ნიშანია. ფრიდრიხ მერცის ნელი სიკვდილი უნდა დასრულდეს და გზა ახალი არჩევნებისთვის უნდა გაიხსნას", - განაცხადა ალის ვაიდელმა.

ცნობისთვის, ბუნდესტაგში კოალიციურ მთავრობაში შემავალი "ქრისტიან-დემოკრატიული კავშირისა“ და გერმანიის "სოციალ-დემოკრატიული პარტიის“ 328 დეპუტატია.