"კვარა" ჩემპიონთა ლიგის ფინალშია - პსჟ-ს მიუნხენი ელოდება: დაძაბული მატჩი და ქართველის უდიდესი როლი: რა შეფასება მიიღო ხვიჩამ?

პარიზში ჩემპიონთა ლიგის ნახევარფინალის მეორე შეხვედრა გაიმართა, სადაც ერთმანეთს "პარი სენ-ჟერმენი" და ლონდონის "არსენალი" დაუპირისპირდნენ. მატჩი პარიზელებმა მოიგეს ანგარიშით - 2-1 და ფინალის საგზური მოიპოვეს.

თამაში "არსენალის" უდიდესი უპირატესობით დაიწყო და საწყის წუთებში არაერთი საგოლე შანსი შექმნეს, თუმცა პარიზელების მეკარე ჯანლუიჯი დონარუმა შესანიშნავად თამაშობდა.

თამაშის მე-17 წუთზე "კვარამ" მეტოქის კარისკენ უძლიერესად დაარტყა, თუმცა ბურთი კარის ძელს მოხვდა.

• მიუხედავად "არსენალის" უპირატესობისა, გოლი პსჟ-მ გაიტანა - მატჩის 27-ე წუთზე ფაბიან რუისმა კვარაცხელიას მიერ მოპოვებული ჯარიმა იდეალურად შეასრულა და ანგარიში 1-0 გახდა.

პირველ ტაიმში ანგარიში აღარ შეცვლილა.

მეორე ტაიმის 68-ე წუთზე პსჟ-მა 11-მეტრიანი ვერ გამოიყენა - ვიტინიას დარტყმული დავიდ რაიამ აიღო.

პარიზელებმა მეორე გოლის გატანა 72-ე წუთზე მაინც შეძლეს - ამჯერად აშრაფ ჰაკიმმა გაიტანა. 77-ე წუთზე "არსენალის" გარემარბმა ბუკაიო საკამ ერთი ბურთი გაქვითა და ანგარიში 2-1 გახდა და ეს ანგარიში აღარ შეცვლილა. მატჩის ბოლო წუთებზე მცირე დაპირისპირება იყო რიკარდო კალაფიორისა და "კვარას" შორის, რის გამოც ორივე ფეხბურთელმა ყვითელი ბარათი მიიღო.

ანალიტიკური საიტის Sofascore-ის მიხედვით, ხვიჩა კვარაცხელიას თამაში ამ მატჩში 10-დან 7.2 ქულით შეფასდა.

• შეგახსნებთ, რომ ჩემპიონთა ლიგის ფინალი 31 მაისს, მიუნხენში გაიმართება. ფინალში პსჟ "ინტერს" დაუპირისპირდება.