კრემლი ფინეთის საზღვართან სამხედრო განლაგებას ზრდის - რა ჩანს თანამგზავრიდან გადაღებულ ფოტოებზე, რაც განგაშს იწვევს?

თანამგზავრიდან გადაღებული ფოტოები აჩვენებს, რომ მოსკოვი ფინეთის საზღვარზე სამხედრო განლაგებას ზრდის და ამ ფოტოების ნახვა ექსპერტებს ახსენებს უკრაინაში ომის დაწყების წინა პერიოდს, როდესაც კრემლი სასაზღვრო ზონებს სამხედრო შენაერთებით აძლიერებდა.

• როგორც ჩანს, ფინეთის საზღვარზე მოსკოვი აშენებს ინფრასტრუქტურას და აღადგენს მთავარ სამხედრო ბაზებზე გარკვეულ ობიექტებს, აძლიერებს თავის შესაძლებლობებს სასაზღვრო ზონაში.

სატელიტის ფოტოები, რომლებიც შვედურმა მაუწყებელმა SVT-მა Planet Labs-სგან მოიპოვა, სავარაუდოდ ასახავს ოთხ ზონას. ესენია - კამენკაში, პეტროზავოდსკში, სევერომორსკ-2-ში და ოლენიაში.

კამენკაში, რომელიც ფინეთის საზღვრიდან დაახლოებით 88 კილომეტრის დაშორებით მდებარეობს და აქამდე სამხედრო ინფრასტრუქტურის მხრივ, ეს ადგილი განვითარებული არ იყო, თებერვლიდან მოყოლებული 130-ზე მეტი სამხედრო კარავი განთავსდა, რომლებიც დაახლოებით 2000 ჯარისკაცს იტევს. სამხედრო ექსპერტები მიიჩნევენ, რომ კრემლის ოფიციალურმა პირებმა ფინეთისა და შვედეთის ნატოში ბოლოდროინდელ გაწევრიანებას "სამხედრო-ტექნიკური რეაგირების ზომების“ ბუნდოვანი მუქარით უპასუხეს.

• "როდესაც ნატოში გაწევრებაზე განაცხადი შევიტანეთ, რუსეთმა გაგვაფრთხილა, რომ ასეთ ნაბიჯებს გადადგამდა. ახლა ვხედავთ, რომ ეს რეალურად ხდება“, - განაცხადა შვედეთის თავდაცვის უწყების ხელმძღვანელმა, მიხაელ კლასონმა.

ფინეთის ნატოში გაწევრიანებამ, მოსკოვში უარყოფითი რეაქცია გამოიწვია. კრემლში მაშინ განაცხადეს, რომ კონფლიქტის წარმოშობის შემთხვევაში, ბირთვული იარაღის გამოყენების საკითხი არ გამოირიცხებოდა.

• როგორც ჩანს, ნატოს გაფართოების საპასუხოდ, მოსკოვი ახლა ომისთვის ემზადება და ჩრდილო-დასავლეთ საზღვარზე ობიექტების სწრაფი განვითარების ბრძანება გასცა.

პეტროზავოდსკში, ფინეთის საზღვრიდან დაახლოებით 160 კილომეტრის დაშორებით, აშენდა სამი დიდი საწყობი, რომლებიც ექსპერტების აზრით, ჯავშანტექნიკის შესანახად გამოიყენება.

თანამგზავრიდან გადაღებულ ფოტოებზე ჩანს, რომ "სევერომორსკ-2“-ის საჰაერო ბაზა, რომელიც ადრე დახურული იყო, ახლა ფუნქციონირებს. გარდა ამისა, ფინეთიდან დაახლოებით 144 კილომეტრის დაშორებით, ოლენიაში საჰაერო ბაზა სრულად აქტიურია და კიევის ცნობით, იქ განლაგებული რუსული ბომბდამშენები უკრაინაში არსებულ სამიზნეებზე რეიდებს ახორციელებენ.

აღსანიშნავია, რომ ფინეთის ნატოში გაწევრების საპასუხოდ, პუტინმა საზღვართან "ლენინგრადის სამხედრო ოლქის“ შექმნისა და ამ ტერიტორიაზე დამატებითი სამხედრო დანაყოფების განლაგების შესახებ განაცხადა.

"ჩვენი სამხედრო ტექნიკისა და არმიის ქვედანაყოფების გადაადგილება... მხოლოდ ჩვენი საქმეა. რუსეთი არასდროს არავისთვის დამუქრებია“, - განაცხადა კრემლის პრესსპიკერმა, დიმიტრი პესკოვმა.

წყარო