"ბავშვობის მეგობრებიდან მხოლოდ ერთი გადაურჩა სასწაულებრივად სიკვდილს" - ვინ არის ბიჭი, რომელიც წყლიდან ცოცხალი ამოიყვანეს

"მინის ჩამსხვრევა მხოლოდ ერთმა მოახერხა, მაგრამ მეგობრებს არ ტოვებდა, რომლებიც სალონში ჩაჭედილები იყვნენ, ხმამაღლა ყვიროდა და მაშველს უხმობდა. ბოლო მომენტში, როცა სალონი წყლით ივსებოდა, ორმა ჩარჩენილმა მეგობარმა უტამ და გიორგიმ ძალით გააგდო სალონიდან სიტყვებით: "ჩვენ თუ ვერა, შენ მაინც გადარჩი!" და მას წყლის ზედაპირისკენ უბიძგეს" - წერს ემოციურ სტატუსს ავარიის დროს გარდაცვლილი ბიჭების ერთ-ერთი ახლობელი სოციალურ ქსელში.

• მართლა სასწაულად გადაურჩა იმ საბედისწერო დღეს, 14 მაისს მომხდარი ავარიის შემდეგ სიკვდილს გიორგი თოლორაია, რომელიც მეგობრებთან ერთად მანქანით გადაადგილდებოდა მტკვრის მარცხენა სანაპიროზე.

საზოგადოებისთვის ცნობილია, რომ "ფორდ- ფუჟენის" მარკის ავტომობილს, რომელშიც 4 ახალგაზრდა იჯდა, ავტომობილი დაეჯახა და ამ უმძიმესი ავარიის შედეგად მტკვარში გადავარდა. მაშველებმა ერთი ახალგაზრდის, გიორგი თოლორაიას გადარჩენა შეძლეს, როგორც ითქვა, მანქანიდან გამოსვლა 23 წლის გიორგი შამუგიამაც მოახერხა. თურმე გიორგი თოლორაია იხსენებს რომ დაინახა, როგორ მოცურავდა ნაპირისკენ მისი მეგობარი, მაგრამ ამ დროს წყალში გადავარდნილმა მანქანამ გადაუარა და მერე არაფერი ვიციო. გიორგი შამუგიას ცხედარს ამ დრომდე ეძებენ.

საზოგადოებამ იცის, რომ საჭირო გახდა მტკვარში წყლის დონის დაწევა და ამ დროს მიაგნეს მაშველებმა იმ ავტომობილს, რომელშიც ბიჭები ისხდნენ და ორი ახალგაზრდის ცხედარი მანქანაში ნახეს.

• ნაპოვნია ორი შვილის მამა, უტა ელიავა და ცხედარი მშობლიურ სახლში, ზუგდიდში გადაასვენეს. მანქანაში მათთან ერთად იმყოფებოდა 19 წლის დავით ოსეტროვი, რომელიც მოსკოვიდან სტუმრად იყო ჩამოსული და მისი ცხედარიც ნაპოვნია. ახლა მხოლოდ გიორგი შამუგიას ძებნა გრძელდება.

"თქვენს სუფთა და უბოროტო სულს შემოვევლე. ახლაა ჩამაკოცნინა თქვენი თავი. სადაც ხარ, როგორც ხარ, მაგრად იყავი, აქ ვარ მეც შენთან ჯიმა აწ და მარადის", - დაწერა სოციალურ ქსელში სიკვდილს სასწაულად გადარჩენილმა გიორგი თოლორაიამ და გიორგი შამუგიასთან გადაღებულ ფოტოს აზიარებს.

როგორც გავარკვიეთ, სამივე ახალგაზრდა სტუდენტი იყო, ისინი ბავშვობიდან მეგობრობდნენ და თბილისში სწავლობდნენ. გიორგის გადარჩენა მიულოცეს მისი სკოლის პედაგოგებმა. თოლორაიამ დაამთავრა ზუგდიდის ერთ-ერთი კერძო სკოლა.

ჩვენ დავუკავშირდით ამ სკოლის დირექტორს, რომელმაც დადებითად დაახასიათა გიორგი.

"გიორგი თოლორაია ჩვენი გამორჩეული მოსწავლე იყო, წარჩინებით, ოქროს მედალზე დაამთავრა სკოლა და შავი ზღვის უნივერსიტეტის სტუდენტია. არაჩვეულებრივი მოსწავლე, წესიერებით და ადამიანური თვისებებით გამორჩეული. მხოლოდ დადებითი შემიძლია მასზე ვისაუბრო. ძალიან მშვიდი, ძალიან გაწონასწორებული, ადამიანური თვისებებით შემკობილი და სწავლაზე ორიენტირებულია ბიჭია. მის მეგობრებს არ ვიცნობდი და ძალიან განვიცდით მომხდარს, ვუსამძიმრებთ მათი ოჯახის წევრებს. გიორგისთან ვცადე გასაუბრება, მაგრამ შოკირებული და სტრესულ მდგომარეობაშია. ძალიან მძიმე ფაქტი მოხდა" - ამბობს გიორგი თოლორაიას კერძო სკოლის დირექტორი, ქალბატონი ნინო.

წაიკითხეთ ასევე:

• მტკვარში გადავარდნილი მანქანის ერთი მგზავრის სამძებრო ოპერაცია გრძელდება - "ეძებენ გიოს! რომ იცოდეთ, როგორ მინდა, მოხდეს სასწაული"