შვეიცარიაში მეწყერმა მთელი სოფელი დაფარა, თუმცა არავინ დაღუპულა - როგორ გადაურჩა 300 მოსახლე სტიქიას? (ფოტო/ვიდეო)
შვეიცარიაში კლდისა და ყინულის უზარმაზარი მასა ჩამოიშალა და ალპურ ზონაში მდებარე ერთ-ერთი სოფელი მთლიანად დაფარა. სტიქიას მსხვერპლი არ მოჰყოლია, რადგან ხელისუფლებამ რამდენიმე დღით ადრე სოფლის მოსახლეობის სრული ევაკუაცია განახორციელა სიფრთხილის მიზნით.
ვიდეო სოციალურ მედიაში, ასევე შვეიცარიულ ტელეარხებზე გავრცელდა
- მეწყერი ბლატენის მახლობლად, სამხრეთ ლოტშენტალის ხეობაში ჩამოწვა. მიწის მასაში სახლები და შენობები ნაწილობრივ ჩაიძირა.
რეგიონულმა პოლიციამ განაცხადა, რომ დაკარგულია ერთი ადამიანი, 64 წლის მამაკაცი და სამძებრო-სამაშველო სამუშაოები თერმული კამერის მქონე დრონის ჩართულობით მიმდინარეობს.
"შემიძლია გითხრათ, რომ სოფლის დაახლოებით 90% განადგურებულია, უდიდესი კატასტროფა მოხდა", - განაცხადა რეგიონის უსაფრთხოების უფროსმა სტეფან განცერმა.
მისივე ინფორმაციით, სოფლის ზემოთ მდებარე მყინვარის დიდი ნაწილი მოწყდა, რამაც მეწყერი გამოიწვია, ასევე დამარხა იქ არსებული მდინარის კალაპოტი. ეს კი კაშხლის წყლის დაბინძურების შესაძლებლობას ზრდის.
"არსებობს რისკი, რომ სიტუაცია შეიძლება გაუარესდეს", - ამბობს უსაფრთხოების სამსახურის ხელმძღვანელი.
- ბოლო დღეებში ხელისუფლებამ დაახლოებით 300 ადამიანის, ასევე ყველა პირუტყვის ევაკუაციის ბრძანება გასცა, რადგანაც წინასწარ ჰქონდათ ინფორმაცია მეწყრის ჩამოწოლის შესაძლებლობის შესახებ.
შვეიცარიელმა გლაციოლოგებმა არაერთხელ გამოთქვეს შეშფოთება ბოლო წლებში მყინვარების დნობის შესახებ, რაც დიდწილად გლობალურ დათბობას უკავშირდება.