2007 წელს გაუჩინარებული 3 წლის გოგონას იდუმალი ამბავი - რა ახალი გარემოებები გამოიკვეთა წლების შემდეგ ყველაზე გახმაურებულ გაუხსნელ საქმეში

პორტუგალიისა და გერმანიის პოლიცია პორტუგალიაში ერთობლივ სამძებრო სამუშაოს ატარებს, რომელიც მადელინ მაკკენის გაუჩინარების საქმეს უკავშირდება.

• სამძებრო სამუშაოები მოიცავს პორტუგალიის სხვადასხვა რეგიონებს, სხვადასხვა ქალაქს, მათ შორის ქალაქ პრაიას საიდანაც თითქმის ორი ათწლეულის წინ გოგონა გაუჩინარდა.

2007 წლის 3 მაისს, 3 წლის მადელინი ოჯახთან ერთად, დასასვენებლად საცხოვრებელ კომპლქსში იყო, საიდანაც გაუჩინარდა. მისი გაუჩინარების ამბავს ევროპის მასშტაბით იძიებენ. ეს მსოფლიოში ერთ-ერთ ყველაზე გახმაურებულ გაუხსნელ საქმედ იქცა.

პორტუგალიის პოლიცია მედიასთან ადასტურებს, რომ გაიცა სპეციალური ბრძანება 2-6 ივლისს სპეციალური სამძებრო სამუშაოების ჩასატარებლად. პორტუგალიაში ჩავიდნენ გერმანელი გამომძიებლები. ქალაქ პრაიაში გადაიკეტა გზები.

გერმანელმა სპეციალისტებმა ამ საქმეში წამყვანი როლი ითამაშეს მას შემდეგ, რაც 2020 წელს მადელინის გაუჩინარების საქმეში მთავარ ეჭვმიტანილად დაასახელეს 48 წლის კრისტიან ბრიუკნერი. ეს უკანასკნელი ამჟამად სხვა დანაშაულისთვის იხდის სასჯელს და გერმანიის ციხეში იმყოფება. კონკრეტულად კი, 72 წლის ტურისტის გაუპატიურება ედება ბრალად.

• გერმანელი გამომძიებლები ეჭვობენ, რომ კრისტიან ბრიუკნერმა მადელინი მოკლა, თუმცა ბრალის წასაყენებლად საკმარისი მტკიცებულებები არ აქვთ. ბრიუკნერმა არაერთხელ უარყო რაიმე მონაწილეობა მადელინის გაუჩინარების საქმეში.

პორტუგალიელი სამართალდამცველები აცხადებენ, რომ ნებისმიერ მტკიცებულებას, რომელსაც იპოვიან, გერმანელ კოლეგებს გადასცემენ.

ამ საქმესთან დაკავშირებით ბოლოს სამძებრო სამუშაოები 2023 წელს ჩატარდა. მაშინ საგამოძიებო მოქმედებები მიმდინარეობდა კაშხალთან, რომელიც მდებარეობს იმ ადგილთან ახლოს, სადაც გოგონა ბოლოს ნახეს. ამჯერად კი პოლიციელების სამიზნე კიდევ ერთხელ არის იმ სახლის შემოგარენი, საიდანაც მადელინი გაუჩინარდა.

• ცნობისთვის, იმ ღამეს, როდესაც მადელინი გაუჩინარდა, ბავშვის მშობლები მეგობრებთან ერთად რესტორანში ვახშმობდნენ. რესტორანი სახლთან ახლოს, ფეხით სავალ მანძილზე მდებარეობდა. მადელინი და მისი უმცროსი ტყუპი და-ძმა კი სახლის პირველ სართულზე იყვნენ და ეძინათ.

მშობლები მთელი საღამოს განმავლობაში ამოწმებდნენ ბავშვებს, სანამ დედამ, ქეითმა, დაახლოებით 22:00 საათზე არ აღმოაჩინა, რომ გოგონა სახლში აღარ იყო. მას შემდეგ მასშტაბური საგამოძიებო მოქმედებები მიმდინარეობს, თუმცა საქმე ამ დრომდე გაუხსნელია.