მშობლებს შეეძლებათ, იწინასწარმეტყველონ შვილებში ალცჰაიმერის, კიბოს და გულის დაავადებების განვითარების ალბათობა - ახალი მეთოდი კამათის მიზეზია
ინ ვიტრო განაყოფიერების (IVF) გამოყენებით მომავალ მშობლებს მალე შეეძლებათ ემბრიონების შერჩევა დაავადებების პოტენციური რისკის მიხედვით.
"სანამ გულისცემა დაიწყება, მანამდე დნმ არსებობს“, - განაცხადა Nucleus Genomics- ის დამფუძნებელმა და აღმასრულებელმა დირექტორმა კიან სადეგიმ.
"დნმ-ისა და გენეტიკური მარკერების შემცველი ერთი ფაილი თქვენი ბავშვის მომავლის შესახებ იმაზე მეტს გეტყვით, ვიდრე ნებისმიერი სხვა ტესტი".
- რა არის IVF?
უნაყოფობის მკურნალობის პოპულარული მეთოდი ქალის საკვერცხეებიდან კვერცხუჯრედების აღებას და ლაბორატორიაში სპერმით განაყოფიერებას გულისხმობს.
შედეგად მიღებული ემბრიონი — რომელიც შეიძლება იყოს გაყინული ან ახალი — თავსდება საშვილოსნოში, სადაც, იმედია, ის საშვილოსნოს კედელში იმპლანტირდება და ორსულობას გამოიწვევს.
იმპლანტაციამდე, ბევრი ინ ვიტრო განაყოფიერების კლინიკა უკვე ატარებს ემბრიონების სკრინინგს გენეტიკურ ანომალიებზე, როგორიცაა დამატებითი ქრომოსომები ან გენური მუტაციები, რამაც შეიძლება გამოიწვიოს იმპლანტაციის ჩავარდნა, მუცლის მოშლა, თანდაყოლილი დეფექტები ან მემკვიდრეობითი დარღვევები.
- კომპანიამ ახლახან გამოუშვა Nucleus Embryo, ახალი პროგრამული პლატფორმა, რომელიც პოტენციურ მშობლებს საშუალებას აძლევს, ჩაუღრმავდნენ თავიანთი ემბრიონების სრულ გენეტიკურ გეგმას. პროგრამა ასევე იკვლევს ფსიქიკური ჯანმრთელობის მდგომარეობებს, როგორიცაა დეპრესია და შიზოფრენია და აფასებს კოგნიტურ თვისებებს, როგორიცაა IQ.
მშობლებს ასევე შეუძლიათ გაეცნონ კოსმეტიკურ და ფიზიკურ მახასიათებლებს, დაწყებული სიმაღლიდან, თვალისა და თმის ფერის ჩათვლით.
ჰარვარდის იურიდიული სკოლის პეტრი-ფლომის ცენტრის მიერ გამოქვეყნებული ანგარიშის თანახმად , ეს პრაქტიკა, რომელიც პოლიგენური ემბრიონის სკრინინგის სახელითაა ცნობილი, სამედიცინო სამყაროში უკვე საკმაოდ საკამათოა: კრიტიკოსები აღნიშნავენ, რომ მშობლებისთვის ემბრიონების სკრინინგის ნებართვის მიცემამ, შესაძლოა გაამწვავოს სტიგმა და დისკრიმინაცია ამ მდგომარეობების მქონე ადამიანების მიმართ.
2023 წელს ჩატარებული გამოკითხვის თანახმად , ამერიკელების 77% მხარს უჭერს მის გამოყენებას ემბრიონების გარკვეული ფიზიკური დაავადებების განვითარების ალბათობის დასადგენად, ხოლო 72% მხარს უჭერს ფსიქიკური ჯანმრთელობის რისკების სკრინინგს. მომხრეები ამტკიცებენ, რომ ეს არაფრით განსხვავდება ვაქცინაციისგან — ეს პრევენციული საშუალებაა და არა ამ მდგომარეობის მქონე პირთა განსჯა.