"ითხოვდა, რომ ბრძოლის ველზე გაგვეშვა, მაგრამ ჩვენ არ ვუშვებდით. თითქმის ბავშვი იყო..." - უკრაინაში 22 წლის ქართველი მებრძოლი დაიღუპა
უკრაინაში, რუსულ ოკუპაციას კიდევ ერთი ქართველი მებრძოლი - 22 წლის დემეტრე დარჩია შეეწირა.
ის დღეს "ქართული ლეგიონის“ ბაზაზე განხორციელებული დივერსიული აქტის შედეგად დაიღუპა.
უკრაინის სპეცსამსახურებისა და ეროვნული პოლიციის მიერ გამოძიებები ამჟამადაც მიმდინარეობს. წინასწარი მონაცემებით, "ქართული ლეგიონის“ ბაზაზე აღმოაჩინეს ასაფეთქებელი, რომლის დეტონაცია მოხდა იმ მომენტში, როდესაც დემეტრე დარჩია მასთან ახლოს იყო.
როგორც ლეგიონის მეთაური, მამუკა მამულაშვილი ამბობს, დარჩია სულ რაღაც 4 თვის ჩასული იყო უკრაინაში.
- "ძალიან კარგი ბიჭი იყო. აქ ჩამოსვლამდე მონასტერში ცხოვრობდა. ძალიან იყო მოტივირებული, უნდოდა, რომ ბრძოლის ველზე მყოფ მებრძოლებს დახმარებოდა. თავად მიიჩნევდა, რომ უკვე მზად იყო ითხოვდა, რომ ბრძოლის ველზე გაგვეშვა, მაგრამ ჩვენ არ ვუშვებდით. თითქმის ბავშვი იყო, არანაირი საბრძოლო გამოცდილება არ ჰქონდა და რამდენადაც შესაძლებელი იყო ბაზაზე ვაყოვნებდით. რას წარმოვიდგენდი.... ძალიან დამწყდა გული“ - ამბობს მამუკა მამულაშვილი.
მისი ვერსიით, რუსებმა დივერსიული აქტი დაგეგმეს და რუსეთის დღესთან დაკავშირებით განახორციელეს.
"ქართული ლეგიონის“ მებრძოლებიდან სხვა არავინ დაშავებულა. ბაზაზე სადაც დემეტრე დარჩია იმყოფებოდა, არც ასაფეთქებელი მოწყობილობები ინახებოდა და არც იარაღი. ოთახში, სადაც ასაფეთქებელი მოწყობილობა იყო განთავსებული, გვიან ღამით მარტო შევიდა და მაშინვე აფეთქდა. საგამოძიებო მოქმედებები ისევ მიმდინარეობს ჩხრეკენ ახლომდებარე ავტომანქანებსაც.