ისრაელის შეტევა ირანზე გრძელდება, დაარტყეს ბირთვულ ელექტროსადგურს - ბოლო ინფორმაცია კონფლიქტის ზონიდან: ისრაელის მთავრობა მოქალაქეებს მიმართავს
ისრაელის სამხედრო ძალები ირანში სამიზნეებზე დარტყმებს აგრძელებენ. ირანული მედიის ცნობით, თეირანის ზოგიერთ ნაწილში ირანის საჰაერო თავდაცვის სისტემა გააქტიურდა.
- ირანში აფეთქებების შესახებ ინფორმაციის გავრცელების შემდეგ, ისრაელის თავდაცვის ძალების წარმომადგენელმა განაცხადა, რომ მათ ისპაანში ირანის ბირთვულ ელექტროსადგურზე დარტყმები განახორციელეს.
განგაშის სირენების ხმა გაისმა იერუსალიმში - ისრაელის სამხედროების თქმით, ამის მიზეზი იემენის ტერიტორიიდან ისრაელის მიმართულებით გაშვებული რაკეტა გახდა. ისრაელის თავდაცვის ძალების განცხადებით, ისრაელის მასშტაბით მოქალაქეებს აქვთ მითითება, რომ დარჩნენ დაცულ სივრცეებთან ახლოს და მინიმუმამდე დაიყვანონ ღია ადგილებში გადაადგილება.
ირანული მედიის ინფორმაციით, ფორდოუს ბირთვულ ობიექტთან ორი აფეთქების ხმა გაისმა. ეს ადგილი თეირანის სამხრეთით, ქალაქ ყუმიდან დაახლოებით 32 კილომეტრში მდებარეობს.