"თუ აგრესია შეწყდება, ბუნებრივია, ჩვენი პასუხებიც შეწყდება“ - რას აცხადებს ირანის საგარეო საქმეთა მინისტრი
ირანის საგარეო საქმეთა მინისტრი აბას არაღჩი აცხადებს, რომ ისრაელზე თავდასხმები დასრულდება მას შემდეგ, რაც ისრაელი შეწყვეტს ირანის წინააღმდეგ სამხედრო კამპანიას.
-
"ჩვენ ვიცავთ თავს, ჩვენი თავდაცვა სრულიად ლეგიტიმურია ეს თავდაცვა ჩვენი პასუხია აგრესიაზე. თუ აგრესია შეწყდება, ბუნებრივია, ჩვენი პასუხებიც შეწყდება“, - ამბობს ირანის საგარეო საქმეთა მინისტრი.
მისივე თქმით, პარსის გაზის საბადოზე ისრაელის მხრიდან განხორციელებული დარტყმები "ძალიან საშიში აქტია", რადგან ამ საბადოს ირანი კატართან ერთად იზიარებს.
"კონფლიქტის გადატანა სპარსეთის ყურეში სტრატეგიული შეცდომაა და მისი მიზანია ომის ირანის ტერიტორიის მიღმა გადატანა", - ამბობს არაღჩი.
- საგარეო საქმეთა მინისტრი ისრაელს ადანაშაულებს ირან-აშშ-ის მიმდინარე ბირთვული მოლაპარაკებების საბოტაჟის მცდელობაში, რასაც მისი თქმით, შეიძლებოდა შეთანხმების გზა გაეხსნა.
"ისრაელის თავდასხმა არასდროს მოხდებოდა მწვანე შუქისა და მხარდაჭერის გარეშე“, - ამბობს არაღჩი და დასძენს, რომ თეირანს არ სჯერა ამერიკელების განცხადებების, რომ ვაშინგტონს მონაწილეობა არ მიუღია ბოლოდროინდელ თავდასხმებში.
"აუცილებელია, რომ შეერთებულმა შტატებმა დაგმოს ისრაელის დარტყმები ირანის ბირთვულ ობიექტებზე, თუ მათ სურთ თავიანთი კეთილი ნების დამტკიცება“, - ამბობს ირანის საგარეო საქმეთა მინისტრი.