სამუდამო პატიმრობა მიუსაჯეს ჩინელ სტუდენტს, რომელმაც 10 ქალი ნარკოტიკებით გააბრუა და გააუპატიურა

სერიულ მოძალადეს, რომელიც დიდ ბრიტანეთსა და ჩინეთში 10 ქალის გაუპატიურებაში დამნაშავედ ცნეს, სამუდამო პატიმრობა მიესაჯა.

განაჩენი 28 წლის ჟენჰაო ზოუს ლონდონის სამეფო სასამართლომ გამოუტანა. ზოუ დამნაშავედ ცნეს გაუპატიურების, უკანონოდ თავისუფლების აღკვეთის და სხვა დანაშაულებში. მათ შორის არის ექსტრემალური პორნოგრაფიული სურათების ფლობა და კონტროლირებადი ნარკოტიკული საშუალების ფლობა სექსუალური დანაშაულის ჩადენის განზრახვით.

პროკურორების თქმით, მისი მსხვერპლთა უმეტესობა ნარკოტიკების ზემოქმედების ქვეშ, „გონდაკარგული და დაუცველი“ იყო.

• პოლიციისა და პროკურორების თქმით, ზოუ, რომელიც ინტერნეტში სხვა გვარს იყენებდა, WeChat-ისა და გაცნობის აპლიკაციების საშუალებით ეცნობოდა ჩინური წარმოშობის სტუდენტებს ლონდონსა და ჩინეთში. შემდეგ მის ბინაში იწვევდა რათა ნარკოტიკებით გაებრუებინა ისინი და აუპატიურებდა.

პოლიციის თქმით, ის მსხვერპლებს ნივთებსაც ართმევდა. მაგალითად, სამკაულებსა და ტანსაცმელს. დიდი ბრიტანეთის პროკურატურის ცნობით, ზოუ ძალადობას მობილურით ან ფარული კამერების გამოყენებით იღებდა.

ზოუ ლონდონის უნივერსიტეტის კოლეჯის დოქტორანტი იყო. ის 2024 წლის იანვარში დააკავეს მას შემდეგ, რაც მისმა ერთ-ერთმა მსხვერპლმა პოლიციას მიმართა.

წყარო