"ეპოქა დასრულდა, დამთავრდა მაუწყებლობა" - ტრამპის ბრძანებით, "ამერიკის ხმის" 600-ზე მეტი თანამშრომელი გაათავისუფლეს: რას წერს ქართული რედაქციის ხელმძღვანელი

დონალდ ტრამპის ადმინისტრაციამ "ამერიკის ხმის" 600-ზე მეტ თანამშრომელს სამსახურიდან გათავისუფლების შესახებ აცნობა, - ამის შესახებ ინფორმაციას სააგენტო Reuters-ი ავრცელებს.

აშშ-ის გლობალური მედიის სააგენტოს (USAGM) უფროსმა მრჩეველმა, კერი ლეიკმა განაცხადა, რომ გათავისუფლების შესახებ შეტყობინება „ამერიკის ხმის“ 639 თანამშრომელს გაეგზავნა.

"სამსახურიდან გათავისუფლების შესახებ შეტყობინება USAGM-ისა და „ამერიკის ხმის“ 639 თანამშრომელს გაეგზავნა, რაც გაბერილი, უპასუხისმგებლო ბიუროკრატიის დაშლის მიზნით დიდი ხნის ძალისხმევის ნაწილია“, - განაცხადა ლეიკმა.

ლეიკის ცნობით, USAGM-ში, „ამერიკის ხმასა“ და „კუბის მაუწყებლობის ოფისში“, მუშაობას 250 თანამშრომელი გააგრძელებს.

• რას წერს "ამერიკის ხმის" "ამერიკის ხმის" ქართული რედაქციის ხელმძღვანელი ანა კალანდაძე სოციალურ ქსელში?

"ეპოქა დასრულდა, დამთავრდა "ამერიკის ხმის" 80- წლიანი მაუწყებლობა, მილიონებს შეუწყდა ეს ხმა მთელს მსოფლიოში, დაგვაკლდება გამალებული ზრუნვა ქართული აუდიტორიისთვის და დავაკლდებით მასაც.წიგნი დაიწერება ჩვენს ღვაწლზე ( ამაზე სხვა დროს).ძალიან სამწუხაროა და მოულოდნელი ასეთი დასასრული, მაგრამ ცვლილებები ყველგან დიდია, წარმოუდგენელიც კი და საგრძნობი. მადლობა ყველა გულშემატკივარს" - წერს კალანდაძე.

შეგახსენებთ, 15 მარტს, აშშ-ის პრეზიდენტის, დონალდ ტრამპის აღმასრულებელი ბრძანების საფუძველზე აშშ-ის გლობალური მედიის სააგენტომ (USAGM) „რადიო თავისუფლებას“ გრანტები შეუწყვიტა და „ამერიკის ხმის“ 1300-ზე მეტი თანამშრომელი ანაზღაურებად ადმინისტრაციულ შვებულებაში გაუშვა. „ამერიკის ხმის“ ჟურნალისტებმა და მათმა პროფკავშირებმა აშშ-ის პრეზიდენტის, დონალდ ტრამპის ადმინისტრაციის წინააღმდეგ სარჩელი ნიუ-იორკის ფედერალურ საოლქო სასამართლოში 22 მარტს შეიტანეს. ფედერალურმა მოსამართლეებმა „ამერიკის ხმის“ დახურვის მიზნით დონალდ ტრამპის ადმინისტრაციის მცდელობები რამდენჯერმე დაბლოკეს, თუმცა უფროსი მრჩევლის, კერი ლეიკის განცხადებით, მარტის შემდეგ სააგენტოს თანამშრომლების რაოდენობა 85%-ით შემცირდა.