22 დაღუპული და ათობით დაშავებული - რა დეტალებია ცნობილი დამასკოში მართლმადიდებლურ ტაძარში აფეთქების შესახებ (ფოტოები)

სირიაში, ბერძნულ მართლმადიდებლურ ეკლესიაში, თვითმკვლელმა ტერორისტმა თავი აიფეთქა. თავდასხმა დამასკოს გარეუბანში, დვეილაში, მარ ელიას ეკლესიაში მოხდა.

• სახელმწიფო მედიის ინფორმაციით, შემთხვევის შედეგად სულ მცირე 22 ადამიანი დაიღუპა, 63 კი დაიჭრა. ადგილობრივი მედია იტყობინება, რომ დაღუპულთა შორის ბავშვებიც არიან.

მომხდარზე პასუხისმგებლობა ჯერ არცერთ დაჯგუფებას არ აუღია. სირიის შინაგან საქმეთა სამინისტროს წარმომადგენელმა, ნურედინ ალ-ბაბამ, პრესკონფერენციაზე განაცხადა, რომ წინასწარი გამოძიება ექსტრემისტულ დაჯგუფება "ისლამურ სახელმწიფოზე“ მიუთითებს. სამინისტროს ცნობით, ერთ-ერთი შეიარაღებული პირი ეკლესიაში შევიდა, იქ მყოფ ადამიანებს ესროლა და შემდეგ თავი აიფეთქა.

"მორწმუნეთა შეკრების ადგილების უსაფრთხოება წითელი ხაზია“, - თქვა მან და დასძინა, რომ "ისლამური სახელმწიფო“ და ასადის გადაყენებული მთავრობის დარჩენილი წევრები სირიის დესტაბილიზაციას ცდილობენ.

სირიის ინფორმაციის მინისტრმა ჰამზა მოსტაფამ შემთხვევა დაგმო და მას ტერორისტული თავდასხმა უწოდა.

წყარო