“არ გიცნობთ, არ მიცნობთ! წუხანდელს აქეთ ვერ დავწყნარდი“ - რას წერს გელა დაიაური ყოველწლიური საღამოს, "მთის საჩუქარი ბარს" შესახებ

წუხელ თბილისში გაიმართა საღამო “მთის საჩუქარი ბარს“, რომელიც პოეტ გელა დაიაურის ხელმძღვანელობით, უკვე მესამე წელია მიმდინარეობს.

ამის შესახებ დაიაური სოციალურ ქსელში წერს და სპონსორებს მადლობას უხდის. თუმცა, როგორც ის აღნიშნავს, გუშინდელ საღამოზე გარკვეულ ინციდენტს ჰქონდა ადგილი, რაც მიუღებელია.

“ვერ მოვითმენ და ალბათ აუცილებელია ვთქვა რამდენიმე სიტყვა წუხანდელი საღამოს,"მთის საჩუქარი ბარს", ინციდენტების შესახებ და მათ გასაგონად, ვინც ამ საღამოს კულისებს მიღმა ღრეობდა და ჩხუბობდა.

იმედია, წაიკითხავენ ან გადასცემენ ახლობლები...

• ხევსურ კაცს სიმთვრალე რომ შესტყობოდა, სირცხვილი იყო, სირცხვილი იყო აცეტება და წარაუგონთ საუბარი... მოვდივართ ბარში და რას ვაჩვენებთ ბარელებს? ვღრეობთ გალეშვამდე და მერე ვჩხუბობთ.... სად ისწავლეთ, ვინ დაგარიგათ, რომ ესე უნდა მოიქცეთ.

ამ ხმაურის და ინციდენტის გამო, შეიძლება, მომავალ წელს უარი გვითხრას მერიამ და ეს საღამო აღარასდროს ჩატარდეს...

მაპატიოს იმ ნორმალურმა ნაწილმა ვინც მოდის, ბოლომდე გულისყურით უსმენს მონაწილეებს და მაქსიმალურად ყურადღებით არიან საღამოს განმავლობაში... მათ დიდი მადლობა...

კიდევ ერთხელ ვიმეორებ, - მთის კაცი სიმთვრალეს არ დაიტყობდა, სირცხვილი იყო... მთის კაცი არ ცანცარებდა, უპატიურ სიტყვას არ იტყოდა და პირუტყვივით არ ღრიალებდა...

თუ ჩატარდა ეს საღამო კიდევ, ასეთ ადამიანებს ვთხოვ, ნუ მოვლენ ამ საღამოზე... არ გიცნობთ, არ მიცნობთ!!!

მაპატიეთ, მაგრამ რომ არ მეთქვა, გული გამისკდებოდა... წუხანდელს აქეთ ვერ დავწყნარდი...

P.S სირცხვილია...“ - წერს დაიაური.