“ძლიერი საქართველოს“ მხარდამჭერები ლოზუნგით: “თავისუფლება რეჟიმის ტყვეებს“ შეკრებილებს შეუერთდნენ - რუსთაველის გამზირზე აქცია დაიწყო (ფოტო)

„საქართველო დადექი“, „თავისუფლება რეჟიმის ტყვეებს“, - ამ ლოზუნგით შეუერთდნენ კოალიცია „ლელო ძლიერი საქართველოს“ წევრები და მხარდამჭერები რუსთაველის გამზირზე მიმდინარე აქციას.

მათ მსვლელობა მარჯანიშვილის მოედნიდან დაიწყეს, პროტესტის მონაწილეებს გაშლილი ჰქონდათ ბანერები და პლაკატები და დაკავებულების გათავისუფლებას ითხოვდნენ.

• “ყველამ უნდა შევარჩიოთ ისეთი პოლიტიკური სტრატეგია, რომლითაც არათუ საკუთარ ჯანმრთელობას, არამედ ივანიშვილს დავაზიანებთ“, - ასე ეხმაურება „ლელო - ძლიერი საქართველოს“ გენერალური მდივანი ირაკლი კუპრაძე ელენე ხოშტარიას განცხადებას, რომ შიმშილობას შეწყვეტს, თუ ოპოზიცია შეთანხმდება და არჩევნებში მონაწილეობას არ მიიღებს.

როგორც კუპრაძემ აღნიშნა, ის სოლიდარობას უცხადებს ელენე ხოშტარიას.

„ის ძალიან მნიშვნელოვანი პოლიტიკური ფიგურაა ჩვენთვის პერსონალურად, მათ შორის, თუმცა, მგონია, რომ უნდა შევარჩიოთ ყველამ ისეთი პოლიტიკური სტრატეგია, რომლითაც არათუ საკუთარ ჯანმრთელობას, არამედ ივანიშვილს დავაზიანებთ“,- აღნიშნა კუპრაძემ.

• როგორც ცნობილია, "პარლამენტის დროებით საგამოძიებო კომისიის მოთხოვნის შეუსრულებლობის ფაქტზე" 23 ივნისს დააკავეს "ძლიერი საქართველოს" ორი ლიდერი - მამუკა ხაზარაძე და ბადრი ჯაფარიძე. მათ სასამართლომ 8-8 თვიანი პატიმრობა შეუფარდა და აუკრძალა თანამდებობის დაკავება 2 წლის ვადით.

რუსთაველის გამზირი ამ დროისთვის, გადაკეტილია. ადგილზე დამონტაჟდა სცენაც.

• “ძირითადი არის ის, რომ ჩვენ პროტესტის ნიშნად ვშიმშილობთ და არა იმის გამო, რომ ვიღაცას აზრი შევაცვლევინოთ ან სხვანაირად იმოქმედოს,“ - ამის შესახებ განაცხადა „კოალიცია ცვლილებისთვის“ წევრმა, გედევან ფოფხაძემ, რომელიც შიმშილობს და გამოეხმაურა ელენე ხოშტარიას განცხადებას, რომ შიმშილობას შეწყვეტს, თუ ოპოზიცია შეთანხმდება და არჩევნებში მონაწილეობას არ მიიღებს.

მისი თქმით, ის და ელენე ხოშტარია შექმნილ ვითარებას აპროტესტებენ და ამბობენ, რომ ამას ერთიანი ძალით უნდა დაუპირისპირდნენ.

„ქვეყანაში ძალიან დიდი ბოროტება ხდება. ხელისუფლებამ პირდაპირ მოკიდა ხელი [ქვეყანას] და მიაქანებს რუსეთისკენ და აქ პუტინისტურ რეჟიმს ქმნის. ამ ვითარებაში, როცა ამდენი პოლიტპატიმარია, სასამართლოში საშინელება ხდება, სახელმწიფო ინსტიტუტებს ლეგიტიმაცია აღარ აქვს - ამ დროს ჩვენ შექმნილ ვითარებას ვაპროტესტებთ და ვამბობთ, რომ ამას ერთიანი ძალით უნდა დავუპირისპირდეთ. ეს არის მთავარი კონტექსტი და არა ის, თვითმმართველობაზე ვინ რა გადაწყვეტილებას მიიღებს“, - განაცხადა გედევან ფოფხაძემ.

შეგახსენებთ, საქართველოს პარლამენტთან პოლიტიკოსებმა ელენე ხოშტარიამ და გედევან ფოფხაძემ პროტესტის ნიშნად შიმშილობა დაიწყეს. ხოშტარიასა და ფოფხაძის შიმშილობის აქტს შეუერთდნენ სამოქალაქო აქტივისტები ვასილ ელიავა, გიორგი სტეპანოვა და ბაჩო კუცია.

ფოტო: გიორგი ჟამერაშვილი