"დანით დასერეს, დააჩოქეს, გააშიშვლეს მთლიანად... იხტუნავეს მის თავზე და იარაღით აშინებდნენ" - 15 წლის ბიჭის მიმართ ჩადენილი უმძიმესი დანაშაულის დეტალები
უმძიმესი დანაშაულის შესახებ გახდა ცნობილი გუშინ. გაირკვა, რომ 9 პირმა არასრულწლოვანი მოტყუებით წაიყვანეს მიტოვებულ შენობაში და მასზე ყველა მეთოდით იძალადეს. დაკავებულები ე.წ. "ფაშისტური" იდეოლოგიის ჯგუფის წევრები არიან.
- გამოძიების ინფორმაციით, ე.წ. "ფაშისტური" იდეოლოგიის ჯგუფის წევრებმა, წარსულში არსებული სიტყვიერი შელაპარაკების საფუძველზე, არასრულწლოვანი წინასწარ შემუშავებული გეგმის შესაბამისად, მოტყუებით მიიყვანეს თბილისში არსებულ ერთ-ერთ მიტოვებულ შენობაში.
"ბრალდებულებმა დაზარალებული სიტყვიერი შეურაცხყოფის, დანებისა და პისტოლეტების გამოყენების მუქარით აიძულეს დამდგარიყო მუხლებზე და დაჩოქილს ცივი იარაღით სხეულის სხვადასხვა არეში მიაყენეს დაზიანებები, ფიზიკური და სიტყვიერი შეურაცხყოფა.
ასევე, დაზარალებული აიძულეს პისტოლეტებისა და დანის გამოყენების მუქარით ღირსების შემლახველი ქმედებებით, დაჩოქილ მდგომარეობაში მყოფს, მობილური ტელეფონის ვიდეოზარით ბოდიში მოეხადა დაჯგუფების ე.წ. ლიდერისათვის. დაზარალებულის ღირსების შემლახველი ქმედებების ამსახველი ვიდეო ბრალდებულებმა მობილური ტელეფონით გადაიღეს და ატვირთეს სოციალურ ქსელში. აღნიშნული ქმედებით დაზარალებულმა განიცადა როგორც ძლიერი ფიზიკური და ფსიქიკური ტკივილი, ასევე მორალური ტანჯვა" - ნათქვამია ოფიციალურ ინფორმაციაში.
დაზარალებული ა.ხ. 15 წლის არის. მის ვინაობას და ფოტოსურათს ჩვენ შეგნებულად არ ვასაჯაროებთ. ცნობილი ხდება დანაშაულის უმძიმესი დეტალები. სოციალურ მედიაში გავრცელებულ კადრებში (კადრებს შეგნებულად არ ვასაჯაროებთ) ჩანს, რომ მოზარდს წამების კვალი ნათლად ეტყობა.
"დანით დასერეს, ძალის გამოყენებით დააჩოქეს, გააშიშვლეს მთლიანად, მიუხედავად იმისა რომ სთხოვდა არ გაეშიშვლებინათ. ამ დროს 15 წლის ბავშვს ყელზე დანა ჰქონდა მიბჯენილი და სხვა გზა არ ჰქონდა. იხტუნავეს მის თავზე და იარაღით აშინებდნენ. თითებზე ჩამოაცვეს პ*ეზერვატივი და გადაუღეს ვიდეო, პოლიციას თუ მიმართავდა გაუვრცელებდნენ" - წერს ბიჭის ახლობელი.
სასტიკად ნაცემი ბიჭის ადვოკატი რადიო თავისუფლებას უყვება, რომ ბავშვთან დალაპარაკება, მხოლოდ რამდენიმე დღის გასვლის შემდეგ შეძლო.
"დანით აქვს დასერილი სხეული. არის სასტიკად ნაცემი. განსაკუთრებით ურტყეს სახესა და თავში. ოჯახი კატეგორიული წინააღმდეგია, რომ დეტალებზე ვისაუბრო. თუმცა, არსებობს უმძიმესი კადრები და დიდი იმედი მაქვს, რომ ეს კადრები საქმეზე მტკიცებულებებად იქნება დართული“.
ცნობილია, რომ 9 დაკავებულიდან 7 არასრულწლოვანია. მათ ბრალდება საქართველოს სისხლის სამართლის კოდექსის 144 ტერცია მუხლის მე-2 ნაწილის „ე“ და „ზ“ ქცვეპუნქტებით (პირის დამცირება, არაადამიანურ, პატივისა და ღირსების შემლახავ მდგომარეობაში ჩაყენება, რაც მას ძლიერ ფიზიკურ, ფსიქიკურ ტკივილს და მორალურ ტანჯვას აყენებს, ჩადენილი ჯგუფურად და წინასწარი შეცნობით არასრულწლოვნის მიმართ) წარედგინათ, რაც სასჯელის სახედ და ზომად 10 წლამდე თავისუფლების აღკვეთას ითვალისწინებს.