"ბავშვი დაიღუპა... საშინელება ხდება" - უმძიმესი ავარია და საცობი რიკოთზე: რა დეტალები ხდება ცნობილი (ფოტოები)

უმძიმესი ავარია მოხდა წუხელ რიკოთზე. ტრაილერმა, რომელიც გადაყირავდა, მსუბუქი ავტომობილი მოიყოლა, სადაც 5 ადამიანი იმყოფებოდა, მათ შორის სამი ბავშვი. თვითმხილველების ინფორმაციით, მომხდარის შედეგად დაიღუპა 3 წლის ბავშვი, 4 ადამიანი კლინიკებში გადაიყვანეს.

უმძიმესი შემთხვევის დეტალებს თვითმხილველები ჰყვებიან. მათი ინფორმაციით, ავტომობილში მშობლები და მათი სამი შვილი იმყოფებოდნენ.

ავარიის გამო რამდენიმე საათი რიკოთზე საავტომობილო მოძრაობა შეზღუდული იყო. აღნიშნულთან დაკავშირებით განცხადება საავტომობილო გზების დეპარტამენტმაც გაავრცელა:

"საერთაშორისო მნიშვნელობის თბილისი-სენაკი-ლესელიძის საავტომობილო გზის 146-ე კმ-ზე საგზაო-სატრანსპორტო შემთხვევის გამო, დროებით იზღუდება მისაბმელიანი და ნახევრადმისაბმელიანი ავტოტრანსპორტის მოძრაობა. ხოლო მსუბუქი ავტოტრანსპორტის მოძრაობა თავისუფალია" - აღნიშნულია ინფორმაციაში.

წაიკითხეთ ასევე:

• რიკოთზე მომხდარი ავარიის ფაქტზე პოლიციამ ერთი პირი დააკავა - რა დეტალები ხდება ცნობილი